दांडिया खेळताय, सावधान ! गरबा-दांडिया खेळताना येतो हार्टअटॅक?

सध्या राज्यात सगळीकडेच नवरत्रतौत्सवाची धूम सुरू आहे. तरूणाईचा उत्साह तर ओसंडून वाहतोय. पण जरा थांबा, हाच दांडिया तुमच्या जिवावर उठू शकतो...होय दांडिया खेळताना सावध राहा, दांडियामुळे तुम्हाला हार्टअटॅक म्हणजेच हृदयविकाराचा झटका येऊ शकतो. छत्रपती संभाजीनगर जिल्ह्यातल्या लासूर स्टेशन इथं एका महिलेचा दांडिया खेळताना हृदयविकाराचा तीव्र झटका आल्यानं जागीच मृत्यू झालाय. नंदिनी अंबादास पवार असं या 35 वर्षीय महिलेचं नाव आहे. गरबा खेळताना नंदिनीचा मृत्यू झाल्यानं सर्वांनाच धक्का बसलाय.

तज्ज्ञांच्या मतानुसार गरबा हा फक्त नृत्याचा प्रकार नाही तर तो एक प्रकारचा वेगानं केला जाणारा व्यायाम आहे. अचानक झालेल्या शारीरिक हालचाली, अपुरी झोप, उपवासामुळे शरीरावर आलेला ताण, चुकीच्या खाण्यापिण्याच्या सवयी आणि पाण्याची कमतरता यामुळे हार्ट अटॅकचा धोका वाढतो. विशेषतः ज्यांच्या हृदयात आधीपासून ब्लॉकेज आहेत किंवा ज्यांना हृदयरोगाचा धोका आहे, त्यांच्यासाठी ही परिस्थिती अधिक धोकादायक ठरू शकते.

तुम्हाला हृदयाशी संबंधित कोणतीही समस्या असल्यास तपासणी करून घ्या..आवश्यकता वाटत असल्यास डॉक्टरांचा सल्ला घ्या. उपाशीपोटी गरबा खेळू नका. उपवासानंतर लगेच जोरदार नृत्य केल्यानं शरीर कमकुवत होतं आणि हृदयावर ताण वाढतो. त्यामुळे हलका आणि पौष्टिक आहार घ्या. गरबा किंवा दांडिया खेळताना घामामुळे शरीरातील पाण्याची पातळी कमी होते. त्यामुळे वेळोवेळी पाणी प्या. उत्साहाच्या भरात खूपवेळ दांडिया खेळू नका. थकवा जाणवल्यास ताबडतोब विश्रांती घ्या.

दांडिया हे आनंदाचं प्रतीक आहेत. मात्र हा आनंद साजरा करत असताना अतिरेक होणार नाही याची दक्षता घ्या. उत्साहाच्या भरात शरीराला दमवून आपला जीव धोक्यात घालू नका. नाहीतर तुम्हालाही हृदयविकाराचा झटका येऊ शकतो

हृदयाशी संबंधित समस्या असल्यास तपासणी करून घ्या

आवश्यकता वाटत असल्यास डॉक्टरांचा सल्ला घ्या

उपाशीपोटी गरबा खेळू नका

उपवासानंतर नृत्य केल्यानं शरीर कमकुवत होतं, हृदयावर ताण

हलका आणि पौष्टिक आहार घ्या

दांडिया खेळताना घामामुळे शरीरातील पाण्याच्या पातळीत घट

डिहायड्रेशन टाळण्यासाठी वेळोवेळी पाणी प्या

उत्साहाच्या भरात खूप वेळ दांडिया खेळू नका

थकवा जाणवल्यास ताबडतोब विश्रांती घ्या