Tadoba Online Booking: ताडोबाला जाणार आहात? वाचा ऑनलाईन बुकिंगबाबत न्यायालयाचा महत्त्वपूर्ण आदेश

Update on Online Tadoba-Andhari National Park oboking

ताडोबा व्याघ्र प्रकल्पाला सफारी बुकिंगसाठी न्यायालयाने परवानगी दिल्याने पर्यटकांची हाेणारी गैरसोय आता टळणार आहे. यामुळे येत्या ४-५ दिवसात ताडोबाची अधिकृत बुकिंग साईट सुरु होण्याची शक्यता ताडोबा व्यवस्थापनाने व्यक्त केली आहे. (Maharashtra News)

या निर्णयामुळे ताडोबा व्यवस्थापनासह रिसॉर्ट मालक, टूर ऑपरेटर, जिप्सी चालक, गाईड आणि स्थानिक व्यावसायिकांना मोठा दिलासा मिळाला आहे. आगामी काळातील दिवाळी, नाताळ आणि नवीन वर्षाच्या बुकिंगचा मार्ग आता मोकळा झाला आहे.

आर्थिक गैरव्यवहारामुळे वाईल्ड कनेक्टीव्हीटी सोल्युशन या बुकिंग करणाऱ्या एजन्सीसोबत ताडोबा व्यवस्थापनाने करार रद्द केला होता. मात्र २०२६ पर्यंत आपला करारनामा असताना ताडोबा व्यवस्थापनाने अचानक करार रद्द केल्याचे सांगत एजन्सीने चंद्रपूर न्यायालयात धाव घेतली होती.

न्यायालयाने यावर सुनावणी करत ताडोबाच्या बुकिंग प्रक्रियेला स्थगिती दिली होती. त्यामुळे गेल्या काही दिवसांपासून ताडोबाची बुकिंग प्रक्रिया ठप्प होती. मात्र आज (शुक्रवार) चंद्रपूर जिल्हा न्यायालयाने (chandrapur district court) ही स्थगिती उठवत ताडोबाला बुकिंगसाठी परवानगी दिली आहे अशी माहिती जितेंद्र रामगावकर (प्रकल्प संचालक, ताडोबा) यांनी साम टीव्हीशी बाेलताना दिली.

यामुळे येत्या ४-५ दिवसात ताडोबाची अधिकृत बुकिंग साईट सुरु होण्याची शक्यता ताडोबा व्यवस्थापनाने व्यक्त केली.

Edited By : Siddharth Latkar