Shahaji Bapu patil : माजी आमदार शहाजीबापू पाटील यांच्या पुतण्याच्या कारवर हल्ला; राजकीय वर्तुळात खळबळ

सोलापूर : सोलापुरातून मोठी राजकीय वृत्त समोर आलं आहे. सोलापुरात युवा शिवसेनेचे संपर्क प्रमुखांच्या कारवर हल्ला झाल्याची घटना घडली आहे. संपर्क प्रमुख हे सांगोल्याचे माजी आमदार शहाजी पाटील यांचे पुतणे आहेत. या घटनेने सोलापुरातील राजकीय वर्तुळात खळबळ उडाली आहे.

मिळालेल्या माहितीनुसार, सोलापूर जिल्हा युवा शिवसेनेचे संपर्क प्रमुख सागर पाटील यांच्या कारवर हल्ला झाल्याची घटना समोर आली आहे. सांगोल्याचे माजी आमदार शहाजी पाटील यांच्या ऑफीससमोर उभ्या केलेल्या कारवर अज्ञात व्यक्तीने हल्ला केल्याची घटना घडली आहे. आज शुक्रवारी सांयकाळच्या सुमारास ही घटना घडली.

सागर पाटील माजी आमदार शहाजी पाटील यांचे पुतणे आहेत. अज्ञात व्यक्तीने कारवर हल्ला केला, त्यावेळी कारमध्ये कोणी नव्हतं. यामुळे मोठा अनर्थ टळला आहे. सागर पाटील यांच्या कारवर अज्ञाताने हल्ला केल्याने राजकीय वर्तुळात खळबळ उडाली आहे. सागर यांच्या कारवर नेमका कोणी हल्ला केला, याची माहिती समोर आलेली नाही. तसेच या प्रकरणी कोणताही गुन्हा दाखल झाल्याची देखील माहिती हाती आलेली नाही.

नेमकं काय घडलं?

शिंदे गटाचे माजी आमदार शहाजी बापू पाटील यांच्या कार्यालयासमोर लावण्यात आलेली कार अज्ञातांनी फोडली. अज्ञातांनी कारच्या मागील बाजूची काच दगडाने फोडली. ही कार शहाजी बापू पाटील यांच्या पुतण्याची होती. सागर पाटील यांची कार फोडल्यानंतर शिवसैनिक संतप्त झाले आहेत. सागर पाटील यांची कार कोणी कशामुळे फोडली, याचं कारण अद्याप समोर आलेलं नाही. अज्ञात व्यक्तीने दगड मारून घटनास्थळावरून पळ काढलाय. त्यामुळे पोलिसांकडून सीसीटीव्हीच्या माध्यमातून अज्ञाताचा शोध घेतला जात आहे. या घटनेनंतर शिंदे गटाच्या कार्यकर्त्यांकडून सोशल मीडियावर राग व्यक्त केला जात आहे.

दरम्यान, सांगोला विधानसभा मतदारसंघात यंदा तिहेरी लढत पाहायला मिळाली. शिंदे गटाचे नेते शहाजी बापू पाटील यांचा शेकापचे उमेदवार बाबासाहेब देशमुख यांनी पराभव केला. शेकापच्या बाबासाहेब देशमुख यांनी महाविकास आघाडीचे उमेदवार दिपक साळुंखे यांनाही पराभवाला सामोरे जावे लागले. सांगोल्यात परभव झाल्याने शहाजीबापू पाटील यांना घरी बसावं लागलं आहे.