पंढरपुराच्या दिशेनं जाताना २ महिलांवर काळाचा घाला, कंटेनरची दुचाकीला धडक; चिरडल्यानं जागीच मृत्यू | Accident

सोलापुरात टेंभुर्णी-पंढरपूर महामार्गावर भीषण अपघाताची घटना उघडकीस आली आहे. भोसे पाटी येथील तळेकर मळ्याजवळ कंटेनर आणि दुचाकी यांच्यात जोरदार धडक झाली. या भीषण अपघातात दोन महिलांचा दुर्दैवी मृत्यू झाला असून, एकजण गंभीर जखमी झाला आहे. गुरू पौर्णिमेच्या दिवशी संत गजानन महाराज पालखी सोहळ्याचे दर्शन घेऊन पंढरपूरला जात होते. या दरम्यान, काळाने झडप घातली. या घटनेनंतर महिलांच्या कुटुंबावर दुखा:चा डोंगर कोसळला आहे.

मोनाली ज्ञानेश्वर मगर (वय वर्ष ३२), सुनीता सुरेश नरसाळ (वय वर्ष ५०) असे अपघाती मृत पावलेल्या महिलांची नावे आहेत. तर, ज्ञानेश्वर सुरेश नरसाळे मगर हे गंभीर जखमी झाले आहेत. गुरूवारी १० जुलै रोजी रात्रीच्या सुमारास टेंभूर्णी रोडवरील भोसे पाटीनजीक तळेकर मळ्याजवळ हा अपघात घडल्याची माहिती आहे. अपघातातील कंटेनर टेंभुर्णीकडून पंढरपूरच्या दिशेनं जात होते. तर कंटेनरने दुचाकीला पाठीमागून धडक दिली.

अपघातानंतर कंटेनर चालक पळून जाण्याच्या तयारीत होता. मात्र, गौतम गायकवाड यांनी त्याला पकडलं. तसेच पोलिसांच्या ताब्यात दिलं. पोलिसांनी या घटनेची माहिती मिळताच त्यांनी घटनास्थळी धाव घेतली आणि दोन महिलांचे मृतदेह शवविच्छेदनासाठी पाठवले. सध्या ज्ञानेश्वर यांच्यावर रूग्णालयात उपचार सुरू आहेत. मोनाली या महिलेच्या डोक्यावरून कंटेनरचा टायर गेल्यानं त्यांचा जागीच मृत्यू झाला. तर, सुनीता यांच्या छातीवरून टायर गेल्यानं त्यांचाही जागीच मृत्यू झाला. या अपघातानंतर पंढरपूर जळोली गावात शोककळा पसरली आहे.

कर्नाटकमधील गाणगापूर येथेही भीषण अपघात

दरम्यान, कर्नाटकमधील गाणगापूर येथेही गुरुपौर्णिमेनिमित्त देवदर्शनासाठी गेलेल्या वसमत तालुक्यातील पाच महिलांचा एसटी बस आणि ऑटोरिक्षा यांच्यात अपघात झाला. यामध्ये दोन महिलांचा रुग्णालयात उपचारापूर्वीच मृत्यू झाला. त्यांच्या मृतदेहांवर वसमत तालुक्यातील बाभुळगाव येथे आज एकत्रित अंत्यसंस्कार करण्यात येणार आहेत. या घटनेने संपूर्ण वसमत तालुक्यावरही शोककळा पसरली आहे.