Lightning Strike : वीज कोसळून महिलेचा जागीच मृत्यू; गुरे चारण्यासाठी गेली असताना घडली घटना

विनायक वंजारे 

सावंतवाडी (सिंधुदुर्ग) : राज्यात बहुतांश ठिकाणी विजांच्या कडकडाटासह परतीचा पाऊस होत आहे. यात अनेक ठिकाणी वीज पडल्याच्या घटना घडत आहे. अशाच प्रकारे गुरे चारण्यासाठी गेलेल्या महिलेच्या अंगावर वीज पडून मृत्यू झाल्याची घटना सावंतवाडी तालुक्यातील चौकुळ, बेरडकी येथे घडली आहे. 

गुरे चारण्यासाठी गेलेल्या द्रौपदी मारुती नाईक असे घटनेत मृत झालेल्या महिलेचे नाव आहे. राज्यात मागील काही दिवसांपासून परतीचा (Rain) पाऊस होत आहे. या पावसामुळे शेती पिकांचे नुकसान झाले आहे. याशिवाय विजांच्या गडगडाटासह जोरदार पाऊस होत आहे. तर काही ठिकाणी विजा पडल्याच्या घटना घडत आहेत. यामध्ये जीवितहानी देखील झाल्या आहेत. अशाच प्रकारे परतीच्या पावसात (Lightning Strike) वीज कोसळून तिचा जागीच मृत्यू झाला. ही घटना काल सायंकाळी चार वाजण्याच्या सुमारास घडली. 

दरम्यान याच परिसरात चार दिवसांपूर्वी येथूनच काही अंतरावर आड्याष्टा येथे पाण्यात वीज पडून एक दुभती म्हैस व एक रेडा जागीच जळून ठार झाला होता. ही घटना ताजी असतानाच सोमवारी अचानक विजेच्या गडगडाटासह या परिसरात पाऊस कोसळत असताना या महिलेवर वीज पडून तिचा दुर्दैवी अंत झाला. गुरे चारण्यासाठी गेलेली महिला घरी न आल्याने तिच्या कुटुंबीयांनी शोध घेतल्यानंतर सदरची घटना उघडकीस आली.