राष्ट्रवादीला जोरदार धक्का! तटकरेंच्या बालेकिल्ल्यात शिंदेंच्या शिवसेनेचा सुरुंग; बड्या नेत्यानं हातात घेतला धनुष्यबाण

सचिन कदम, रायगड प्रतिनिधी

Darshan Vichare Leaves NC : रायगड जिल्ह्यात महायुतीमध्ये राष्ट्रवादी काँग्रेस आणि शिंदे यांच्या शिवसेनेत अंतर्गत संघर्ष सुरूच आहे. सुनील तटकरे आणि भरत गोगावले यांच्यातील राजकीय संघर्ष रायगड जिल्ह्यातील राजकीय वर्तुळात चर्चेचा विषय असतोच. राष्ट्रवादी काँग्रेस आणि शिवसेना नेत्यांकडून एकमेकांवर आरोप प्रत्यारोप करतात. त्यातच आता रायगडमध्ये तटकरेंना जोरदार धक्का बसला आहे. मंत्री अदिती तटकरे यांचा बालेकिल्ला मानल्या जाणाऱ्या श्रीवर्धनमध्ये शिवसेनेने राष्ट्रवादीला मोठा सुरुंग लावला आहे.

श्रीवर्धनचे राष्ट्रवादीचे माजी तालुकाध्यक्ष आणि उद्योजक दर्शन विचारे यांनी राष्ट्रवादी काँग्रेसला सोडचिठ्ठी दिली. ते आता शिवसेना (शिंदे गट) मध्ये प्रवेश करणार आहेत. मंत्री भरत गोगावले यांच्या प्रमुख उपस्थितीत आणि आमदार महेंद्र थोरवे व आमदार महेंद्र दळवी यांच्या उपस्थितीत हा पक्षप्रवेश पार पडणार आहे. या निमित्ताने जोरदार शक्तिप्रदर्शन करून तटकरेंना शह देण्याची तयारी शिवसेनेने केली आहे.

पक्ष सोडताना दर्शन विचारे यांनी तीव्र शब्दांत तटकरेंवर टीका केली. रायगड जिल्ह्यात कोणताही राष्ट्रवादी पक्ष उरलेला नसून ती फक्त 'तटकरे प्रायव्हेट लिमिटेड कंपनी' झाली आहे, असे त्यांनी म्हटले आहे. सत्तेत एकत्र असले तरी रायगडच्या स्थानिक राजकारणात दोन्ही पक्षांमधील विसंवाद पुन्हा एकदा चव्हाट्यावर आला आहे. विचारे यांच्यामुळे श्रीवर्धनमध्ये शिवसेनेची ताकद वाढली आहे. विधानसभा निवडणुकीआधी हा तटकरेंना जोरदार धक्का मानला जातोय.