दोन दिवसांपुर्वी नागपुर शहराला मुसळधार पावसाचा फटका बसला. पावसामुळे अंबाझरी तलाव ओव्हरफ्लो झाला. या तलावाचे पाणी नागपुरच्या सखल भागात शिरले. अनेक घरांमध्ये पाणी शिरल्याने नागरिकांनी संताप व्यक्त केला. यावरुन आता राजकीय वर्तुळातही आरोप- प्रत्यारोप सुरू झाली आहे. नागपूरमधील पूरपरिस्थिती वरून ठाकरे गटाचा देवेंद्र फडणवीस, नितीन गडकरी आणि RSS वर जोरदार हल्लाबोल करण्यात आला आहे.
सामना अग्रलेखातून टीका....
राज्याची उपराजधानी नागपूरच्या (Nagpur) विकासाच्या वल्गना शनिवारी चार तासांच्या मुसळधार पावसात वाहून गेल्या. नाग नदीला आलेल्या महापुराने पाच जणांचे बळी घेतले. दहा हजारांपेक्षा जास्त बैठी घरे, बंगले, झोपड्या, दुकाने यांचे भयंकर नुकसान झाले. अनेक गाड्या वाहून गेल्या. कमी काळात प्रचंड पाऊस हे या हाहाकाराचे कारण सांगितले जात आहे.
त्यात तथ्य असले तरी नागपूरच्या विकासाच्या गप्पा शेवटी 'गोलगप्पा'च ठरल्या या वस्तुस्थितीचे काय? नागपूरच्या विकासाचा ठेका आणि मक्ता ज्या स्वयंघोषित ठेकेदारांकडे वर्षानुवर्षे आहे, त्यांच्याकडे या प्रश्नाचे काय उत्तर आहे? ते नसल्यानेच मग आक्रोश करणाऱ्या पूरग्रस्तांना हाताने धरून बाजूला करण्याची वेळ आज तुमच्यावर आली.
एरवी मुसळधार पावसाने मुंबईत (Mumbai) पाणी साचले की, शिवसेनेकडे बोट दाखविणारे तुम्हीच आहात ना? मग आता ज्या नाग नदीतून बोटी चालविण्याचे स्वप्न तुम्ही दाखविले त्याच नाग नदीत हजारो कुटुंबांची घरेदारे, संसार, गाडय़ा वाहून जाताना पाहण्याची वेळ नागपूरकरांवर का आली? त्यासाठी कोणाकडे बोट दाखवायचे? याच नाग नदीच्या महापुरात तुमच्या तथाकथित विकासाचा आज चिखल झाला आहे आणि त्या चिखलात सामान्य नागपूरकर आपले किडुकमिडुक शोधत वणवण फिरत आहेत. त्याचे काय प्रायश्चित्त तुम्ही घेणार आहात?
मुंबईला जशी भौगोलिक मर्यादा आणि सागरी निर्बंध आहेत, दाटीवाटीची लोकवस्ती आहे तसे नागपूरबाबत नाही. तरीही तुमचे तेथील विकासाचे मॉडेल शनिवारच्या महापुरात वाहून गेले. केवळ चार तासांच्या पावसात (Nagpur Rain) नागपूर बुडाले. त्यात तुमच्या विकासाच्या थापा गटांगळ्या खाताना संपूर्ण महाराष्ट्राने पाहिले. या महापुराने नागपूरच्या स्वयंघोषित ठेकेदारांचा मुखवटाही गळून पडला.
आता तरी ते आणि त्यांचा 'परिवार' काही 'चिंतन' करणार आहेत का? मुंबई तुंबली म्हणून शिवसेनेकडे (Shivsena) बोट दाखविणाऱ्यांचे आता नागपूरचे 'तुंबापूर' झाले यावर काय म्हणणे आहे? नागपूर कोणी बुडवले? असा प्रश्न नागपूरकर विचारत आहेत. त्याचे आधी उत्तर आणि मगच नागपूरच्या विकासाच्या वल्गना करा... अशा शब्दात सामनामधून टीका करण्यात आली आहे. (Latest Marathi News)
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.