मतं मागायची असतील तर आपल्या बापाच्या नावावर मागा, बाळासाहेबांचं नाव वापरु नका - संजय राऊत

मुंबई : शिवसेनेचे बंडखोर नेते आणि मंत्री एकनाथ शिंदे (eknath shinde) यांनी बंडोखोरी करुन जवळपास ५० समर्थक आमदारांसह शिंदे गट स्थापन केला आहे. त्यामुळे महाविकास आघाडीसह शिवसेना (shivsena) मोठा धक्का बसला आहे. शिंदे गट आणि शिवसेनेत संघर्ष पेटला असून शिवसैनिक कमालीचे आक्रमक झाले असून बंडखोरांविरोधात घोषणाबाजी करत आहेत. शिवसेनेची राष्ट्रीय कार्यकारिणीची बैठक सेनाभवनात नुकतीच पार पडली. यावेळी शिवसेनेचे खासदार संजय राऊत (sanjay raut) यांनी एकनाथ शिंदे गटावर तोफ डागली आहे. तं मागायची असतील तर आपल्या बापाच्या नावावर मागा, बाळासाहेबांचं नाव वापरु नका, असा सज्जड इशारा राऊत यांनी एकनाथ शिंदे गटाला दिला आहे.

यावेळी माध्यमांशी बोलताना राऊत म्हणाले, बाळासाहेब ठाकरे (balasaheb thackeray) यांचं नाव इतर कोणत्याही राजकीय पक्षाला देता येणार नाही. शिवसेना बाळासाहेबांची आहे आणि राहणार. शिवसेना बाळासाहेबांचे विचार घेवून महाराष्ट्रात पुढे जाईल. बाळासाहेब ठाकरे यांचा नाव कुणालाही लावता येणार नाही. ज्यांनी बेईमानी केली ते कोणत्याही पदावर असो, त्यांच्यावर कारवाई करण्याचे सर्वाधिकार उद्धव ठाकरे यांच्याकडे आहेत.

आगामी निवडणुका उद्धव ठाकरेंच्या नेतृत्वात लढू. कुठलाही गद्दार बाळासाहेबांच नाव वापरु शकत नाही.बंडखोर आमदारांवर लवकरच कारवाई केली जाईल. मतं मागायची असतील तर आपल्या बापाच्या नावावर मागा, शिवसेनेच्या बापाचं नाव लावू नका, असा इशारा राऊत यांनी शिंदे यांना दिला आहे.

Edited By - Naresh Shende