Washim National Highway : वाहतूक कोंडी, अपघात कमी होणार, वाशिममधील राष्ट्रीय महामार्गात मोठा बदल होणार; महत्वाची माहिती समोर

वाशिम शहरासाठी वाहतुकीच्या दृष्टीने महत्त्वाचा असलेला राष्ट्रीय महामार्ग क्रमांक १६१ अखेर फोर-लेनचा होणार असल्याची माहिती यवतमाळ–वाशिम लोकसभेचे खासदार संजय देशमुख यांनी पत्रकार परिषदेत दिली. या महामार्गाचे अकरा किलोमीटरचे सुरुवातीचे नियोजन आता ५. ११ किलोमीटरवर स्थिरावले असून, या कामासाठी केंद्र सरकारने ८९ कोटी रुपये मंजूर केले आहेत.

या प्रकल्पामुळे वाशिम शहरातून जाणाऱ्या वाहतुकीत लक्षणीय सुधारणा होणार आहे. याबाबत गेल्या काही दिवसांपासून विविध चर्चा, अफवा, तर्क-वितर्क सुरू होते. काहींनी हा महामार्ग केवळ दोन लेनचा केला जात असल्याचा दावा केला होता. मात्र, खुद्द केंद्रीय मंत्री नितीन गडकरी यांची भेट घेऊन या प्रकल्पाच्या स्वरूपावर सविस्तर चर्चा केल्यानंतर खासदार देशमुख यांनी स्पष्टपणे सांगितले की, महामार्ग निश्चितच फोर-लेनचा राहणार आहे.

या पत्रकार परिषदेत शिवसेनेचे आणि काँग्रेसचे स्थानिक पदाधिकारी देखील उपस्थित होते, यावरून या निर्णयासाठी सर्वपक्षीय सहमती मिळाल्याचे संकेत मिळत आहेत. महामार्गाचा फोर-लेनचा मार्ग वाशिमच्या शहरी आणि ग्रामीण भागासाठी महत्त्वपूर्ण ठरणार असून, वाहतूक कोंडी, अपघातांची शक्यता आणि प्रवासाचा कालावधी या तिन्ही बाबींमध्ये मोठा फरक पडणार आहे.

महामार्गाचे काम लवकरात लवकर पूर्ण व्हावे यासाठी प्रशासनाच्या माध्यमातून सातत्याने पाठपुरावा केला जाईल, असे आश्वासन खासदार देशमुख यांनी दिले. हा प्रकल्प राबवताना स्थानिकांचे हित लक्षात घेऊन काम करण्याचा प्रयत्न राहील, असेही त्यांनी स्पष्ट केले.