गद्दारांना कठोरात कठोर शिक्षा मिळायला हवी; औरंगाबादेत महिला शिवसैनिकांना अश्रू अनावर

मुंबई : शिवसेनेचे नेते तसेच महाविकास आघाडी सरकारमधील मंत्री एकनाथ शिंदे यांनी बंड केलं आहे. एकनाथ शिंदे शिवसेनेच्या 30 ते 35 आमदारांना घेऊन गुवाहटी येथे पोहचले आहे. त्यांच्या या पवित्र्यामुळे महाविकास आघाडी सरकार कोसळण्याची शक्यता वर्तवली जात आहे. अचानक शिंदे यांनी बंड केल्याने शिवसैनिकांमध्ये नाराजी पसरली आहे. दरम्यान, शिंदे यांच्यासोबत औरंगाबाद जिल्ह्यातील 5 आमदार असल्याची माहिती आहे. अशातच औरंगाबादेतील शिवसैनिकांनी नाराजी व्यक्त करत एकनाथ शिंदे यांच्याविरोधात घोषणाबाजी केली. (Shivsena Latest News)

एकनाथ शिंदे यांनी अचानक घेतलेल्या या निर्णयामुळे शिवसेनेत प्रचंड खळबळ उडाली आहे. याविरोधात सगळीकडे निदर्शने करण्यात येत आहेत. अशातच आज सकाळी औरंगाबाद शहरातील क्रांती चौकात आम्ही उद्धव साहेबांसोबत अशा घोषणा देत निदर्शने करण्यात आली. यावेळी महिला शिवसैनिक भावनिक झाल्याच पाहायला मिळाल्या. यावेळी महिला शिवसैनिकांना अश्रुही अनावर झाले होते. (Shivsena Latest Marathi News)

शिवसेनेकडून जे आमदार निवडूण आले आहेत. त्यांना सर्व शिवसैनिकांसह मतदारांनी मतदान करून अत्यंत मेहनतीने निवडून आणले आहे. त्यांनी पक्षासोबत एकनिष्ठ राहायला हवं होतं. मात्र आज त्यांनी त्यांची निष्ठा विकून टाकत शिवसेनेला संकटात टाकलं. याचा आम्ही निषेध करतो असं म्हणत महिला शिवसैनिकांनी एकनाथ शिंदे यांच्यासह बंडखोर झालेल्या सर्व आमदारांचा निषेध केला आहे.

इतकंच नाही तर, शिवसेनेसोबत गद्दारी करणाऱ्या या गद्दार आमदारांना कठोरात कठोर शिक्षा मिळावी अशी मागणीही महिला आंदोलकांनी केली. यावेळी महिला आमदारांना अश्रू अनावर झाले होते.

Edited By - Satish Daud