शरद पवारांनी केले गणपतराव देशमुख कुटुंबीयांचे सांत्वन; म्हणाले...

सांगोला : शेतकरी कामगार पक्षाचे ज्येष्ठ नेते माजी आमदार गणपतराव देशमुख यांच्या निधनानंतर आज राष्ट्रवादी काँग्रेस पक्षाचे अध्यक्ष खासदार शरद पवार यांनी सांगोला येथे देशमुख कुटुंबियांची भेट घेऊन सांत्वन केले. आज दुपारी १२.३० वाजता शरद पवार सांगोला मधील गणपतराव देशमुख यांच्या घरी दाखल झाले. यावेळी गणपतराव यांच्या पत्नी रतनबाई, मुलगा चंद्रकांत, पोपटराव, मुलगी शोभा पाटील, नातू अनिकेत व बाबासाहेब उपस्थित होते.

हे देखील पहा -

यावेळी गणपतरावांबद्दल बोलताना शरद पवार म्हणाले की, आमदार गणपतराव देशमुख यांच्या सोबत आपण अनेक वर्षे राजकीय क्षेत्रामध्ये काम केले आहे. स्वच्छ चारित्र्य संपन्न असा महाराष्ट्रातील हा नेता होता. सुरुवातीला आमच्या कुटुंबातील लोकांनी सुद्धा शेतकरी कामगार पक्षात काम केले आहे. त्यामुळे शेकाप यामधील अनेक ,नेतेमंडळींची आमच्या घरात वर्दळ असायची. त्यात गणपतराव देशमुख यांचाही समावेश होता. माझे वडील बंधू आप्पा साहेब यांच्याशी गणपतराव यांचे चांगले स्नेहसंबंध होते.

महाराष्ट्रातील ग्रामीण भागातील लोकांसंदर्भातली चिंता नेहमी गणपतराव व्यक्त करायचे. दुष्काळी सांगोला मधून सुरू झालेली रोजगार हमी योजना. या माध्यमातून अनेक लोकांना रोजगार मिळाला. त्यामुळे या योजनेची दखल केंद्र सरकारने सुद्धा घेतली होती.

Edited By : Krushnarav Sathe