वेगळा विदर्भ आंदोलन; आंदोलकांना पोलिसांनी घेतले ताब्यात

मंगेश मोहिते

नागपूर : वेगळ्या विदर्भाच्या मागणीसाठी विदर्भवादी आंदोलक कालपासून आंदोलन करत आहेत. "वेगळा विदर्भ झाला पाहिजे, विदर्भ आमच्या हक्काचा नाही कोणाच्या बापाच्या" अशा घोषणा देत विदर्भाच्या कानाकोपर्‍यातून आलेल्या कार्यकर्त्यांनी वेगळ्या विदर्भ राज्याच्या मागणीसाठी कालपासून आंदोलन सुरु केले आहे.

हे देखील पहा -

नागपूरच्या शहीद चौकातील विदर्भ चंडिकेसमोर, कालपासून विदर्भवाद्यांचे ठिय्या आंदोलन सुरू आहे. स्वतंत्र राज्य आणि वीज बिलाच्या विरोधात विदर्भ राज्य आंदोलन समिती यांनी 9 ऑगस्ट क्रांती दिनाचे औचित्य साधून केंद्र व राज्य सरकार विरोधात आक्रमक पवित्रा घेतला आहे.

शहरात विविध ठिकाणी बॅनर लावून विदर्भाचा झेंडा हातात घेऊन संपूर्ण कार्यकर्ते कालपासून आंदोलनात उतरले आहेत. मात्र, पोलिसांनी आज या सगळ्या कार्यकर्त्यांना ताब्यात घेतले आहे. कारण, आंदोलनकर्त्यांनी सात दिवस आंदोलन करणार असे पत्र पोलीस विभागाला दिले होते. पण पोलिसांनी त्यांना संमती दिली नव्हती. तसेच, कोरोना नियमांचे उल्लंघन होत असल्याचे कारण देऊन पोलिसांनी आंदोलकांना ताब्यात घेतले आहे.

Edited By : Krushnarav Sathe