Phaltan News : फटलण डॉक्टर अत्याचार प्रकरणातील आरोपी PSI बदनेचा जुना व्हिडिओ व्हायरल

ओंकार कदम, सातारा प्रतिनिधी, साम टीव्ही मराठी

PSI Gopal Badane’s Video Viral : साताऱ्यातील फलटणमधील महिला डॉक्टर बलात्कार अन् आत्महत्या प्रकरणाने राज्यात खळबळ उडाली आहे. यामध्ये महिला डॉक्टराने आत्महत्या करण्याआधी पीएसआय गोपाळ बदने आणि घरमालक प्रशांत बनकर यांची नावे लिहिली होती. रक्षकच भक्षक झाल्यामुळे महाराष्ट्रात संतापाची लाट उसळली होती. याच प्रकरणातील आरोपी क्रमांक दोन असलेल्या पीएसआय गोपाळ बदने याचा जुना एक व्हिडिओ सध्या सोशल मीडियावर व्हायरल झाला आहे. रस्त्यावर विनाकारण गाड्या अडवून चौकशी करत असल्याचे या व्हिडिओत दिसतेय. हा व्हिडिओ व्हायरल झाल्यानंतर पुन्हा एकदा फलटण पोलिसांवर लोकांकडून टीकेची झोड उडत आहे. (PSI Gopal Badane old video viral on social media)

फलटण महिला डॉक्टर अत्याचार प्रकरणातील संशयित आरोपी पीएसआय गोपाल बदने याचा जुना व्हिडिओ सोशल मीडियावर जोरदार व्हायरल होत आहे. वर्दीवर नलतानाही पीएसआय बदने हा रस्त्यावर गाड्या अडवून चालकांची विचारपूस करत असल्याचे या व्हिडिओत स्पष्ट दिसतंय. एका वाहनचालकाने त्यावेळी त्याचा मोबाईल काढून या घटनेचं चित्रीकरण केलं आणि तोच व्हिडिओ आता सोशल मीडियावर चांगलाच व्हायरल होताना दिसतोय.

दरम्यान, बदने सध्या फलटण पोलिस ठाण्यातील बलात्कार प्रकरणात संशयित असून तो पोलिस कोठडीत आहे.चालकाची विनाकारण विचारपूस करत असलेल्या बदने याचा हा व्हिडिओ कधीचा आहे, याबाबत पोलिसांकडून अद्याप कोणतीही अधिकृत प्रतिक्रिया मिळालेली नाही. पण फलटण आणि साताऱ्यात हा व्हिडिओ तुफान व्हायरल होत आहे. बदने याच्या या व्हिडिओमुळे पोलिसांवर टीकेची झोड उडाली आहे. सर्वसामान्यांकडून याबाबत संताप व्यक्त करण्यात येतोय. कायद्याचे रक्षकच असे करत असतील, तर सर्वसामान्यांनी काय करावे? असा सूर नेटकऱ्यांचा आहे.