Nandurbar News: भरधाव कार आणि दुचाकीची जोरदार धडक; थरारक अपघातात २ जण ठार

Nandurbar:

सारंगखेडा ते शहादा रस्त्यावरील सप्तशृंगी पेट्रोल पंपाजवळ कापसाने भरलेले वाहन व मोटरसायकलीचा भीषण अपघात झालाय. अपघात इतका भीषण होता की, या अपघातात दोन युवकांचा जागीच मृत्यू झाला आहे.

घटनेबाबत मिळालेल्या माहितीनुसार, आज सकाळी दोन्ही युवक सारंगखेडा येथे मासेमारी करण्यासाठी येत होते. यावेळी समोरून येणाऱ्या वाहनाने त्यांच्या दुचाकीला जोरदार धडक दिली. धडक जोरदार बसल्याने यात दोन्ही युवक रस्त्याच्या बाजूला फेकले गेले.

धावत्या दुचाकीवरून हवेत लांबवर ते फेकले गेले आणि धाडकन खाली कोसळले. त्यामुळे दोघांनाही गंभीर दुखापत झाली. या अपघातात दोघांचाही जागीच मृत्यू झाला. अपघात होताच स्थानिक नागरिक मदतीला धावून आले.

यावेळी सारंगखेडा येथील सरपंच शेताकडे जात असताना त्यांनी रस्त्यावरील अपघात झाले आहे म्हणून त्यांनी तात्काळ सारंगखेडा पोलीस स्टेशन व सारंगखेडा प्राथमिक आरोग्य केंद्रात संपर्क केला. या घटनेत कापसाने भरलेली गाडी देखील पलटी झाली. वाहन चालकाला सारंगखेडा पोलिसांनी ताब्यात घेतले आहे. अद्याप या घटनेत मृतांची ओळख पटली नसून पोलीस ओळख पटविण्याचे काम करत आहेत.