Sangli Crime : लग्नाला १७ दिवस झाले, वटपौर्णिमेच्या दिवशीच बायकोनं घात केला, आधी कुऱ्हाडीने वार नंतर...; नवऱ्याला क्रूरपणे संपवलं

विजय पाटील, साम टीव्ही, प्रतिनिधी

सांगलीच्या कुपवाडमधील प्रकाशनगरमध्ये धक्कादायक प्रकार घडला. लग्नाच्या सतरा दिवसांतच एका महिलेने तिच्या नवऱ्याचा जीव घेतला. वटपौर्णिमेच्या रात्री आरोपी महिलेने तिच्या नवऱ्यावर कुऱ्हाडीने वार केले. हल्ल्यात महिलेचा नवरा जागीच ठार झाला. या घटनेमुळे आसपासच्या परिसरात मोठी खळबळ उडाली आहे.

मिळालेल्या माहितीनुसार, सांगलीतील कुपवाडच्या प्रकाशनगरमधील एकता कॉलनीत अनिल तानाजी लोखंडे (वय ४५) याची हत्या झाली. वटपौर्णिमेच्या रात्री साडेअकरा ते साडेबाराच्या सुमारास अनिलच्या बायकोने त्याच्यावर प्राणघातक हल्ला केला. डोक्यावर कुऱ्हाडीचा वार झाल्याने अनिल लोखंडेचा जागीच मृत्यू झाला. अनिलचे सतरा दिवसांपूर्वी दुसरे लग्न झाले होते.

अनिल लोखंडे यांची पहिल्या बायकोचा कर्करोगाने मृत्यू झाला होता. अनिलला दोन मुली आहेत. त्या दोन्ही मुलींच्या लग्नानंतर अनिल एकटाच घरी राहत होता. पोटाचे हाल होत असल्याने नातेवाईकांनी त्याचे दुसरे लग्न लावून दिले. सातारा जिल्ह्यातील खटाव तालुक्याच्या वडी गावातील राधिका इंगळे या २७ वर्षीय तरुणीशी अनिलचे दुसरे लग्न लावून दिले.

१७ मे २०२५ रोजी अनिल आणि राधिका यांचे लग्न झाले होते. पण लग्नानंतर अवघ्या १७ दिवसांनी वटपौर्णिमेच्या रात्री राधिकाने अनिलच्या डोक्यावर, हातावर कुऱ्हाडीने वार केला. प्राणघातक हल्ल्यात अनिलचा जीव गेला. घटनेची माहिती मिळताच कुपवाड औद्योगिक वसाहत पोलिसांनी आरोपी राधिकाला ताब्यात घेतले. राधिकाने अनिलची हत्या का केली यामागील कारणाचा शोध पोलीस घेत आहेत.