Sangli Flood News : सुरक्षित ठिकाणी जा, मागे राहण्याचं धाडस करू नका! सांगलीत पुराचा धोका वाढताच माजी पालकमंत्र्यांचं आवाहन

कोल्हापूर आणि सांगली जिल्ह्यात सध्या मूसळधार पाऊस सुरू आहे. बहुतेक सर्व धरणं पूर्ण क्षमतेने भरल्यामुळे धरणांमुधून पाण्याचा मोठ्या प्रमाणात विसर्ग सुरू आहे. त्यामुळे जिल्ह्यातील संभाव्य पूरस्थिती लक्षात घेता नागरिकांना सावध राहण्याचं आणि काळजी घेण्याचं आवाहन माजी पालकमंत्री जयंत पाटील यांनी केलं आहे. धोका पातळीच्या परिसरातील नागरिकांनी सुरक्षितस्थळी जावं, कोणीही मागे राहण्याचं धाडस करून नये असंही त्यांनी म्हटलं आहे.

जिल्ह्यातील सध्याच्या पूरस्थितीची माहिती देताना जयंत पाटील म्हणाले की, सांगली जिल्ह्यातील नागरिकांना विशेषतः वारणा आणि कृष्णा नदीकाठच्या नागरिकांना विनंती आहे की त्यांनी घाबरून जाऊ नये. जिल्ह्यातील नद्यांची पातळी थोडीशी वाढली आहे. प्रशासनाने पाण्याचा विसर्ग कर्नाटकाकडे वाढवला तर नद्यांच्या पाण्याची पातळी कमी होईल. नागरिकांनी प्रशासनाने दिलेल्या सूचनांचं पालन करा, असं ते म्हणाले.

पूरस्थिती असलेला भाग जर खाली केला जात असेल तर मागे राहण्याचे धाडस करू नका. आपल्या जनावरांना घेऊन सुरक्षित ठिकाणी पोहोचा. सर्व काही पावसावर अवलंबून आहे. सर्वांनी काळजी घ्या. कार्यकर्ते, प्रशासन आपल्या सोबत आहे, असं आवाहनही त्यांनी केलं आहे.

कोयणा कोयना धरण पाणलोट क्षेत्रात आणि घाटमाध्यावर कोसळणाऱ्या मुसळधार पावसाचा जोर पुन्हा वाढला आहे. त्यामुळे कोयना धरणात येणाऱ्या पाण्याची आवक वाढली आहे. कोयना धरणात ८२.०१ टीएमसी पाणीसाठा झाला होतो. सध्या कोयना धरणातून ३० हजार क्युसेक आणि पायथा विजगृहातून एक हजार ५० क्युसेक पाण्याचा विसर्ग सुरू आहे. बहुतेक धरणांमधून पाण्याचा विसर्ग सुरू करण्यात आल्यामुळे कृष्णा आणि वारणा नद्यांच्या पाणी पातळीत वाढ झाली आहे. त्यामुळे पुराचा धोका वाढला आहे.