Sangli : आईचा हात पकडून मुलगा घरी निघाला; अर्ध्यात काळाने डाव साधला; ६ वर्षीय मुलाला डंपरने चिरडलं

सांगलीच्या भिलवडी येते शाळेतून घरी परतणाऱ्या शाळकरी मुलावर डंपर अंगावर गेल्याने त्याचा जागीच मृत्यू झाला आहे. ही हृदयद्रावक घटना शनिवारी सकाळी सरळी पुलाजवळ घडली. अपघातानंतर डंपर चालक घटनास्थळावरून फरार झाला आहे. भिलवडी पोलीस अधिक तपास करत आहेत.

मृत मुलाचे नाव राज वैभव पवार (वय ६ ) असे आहे. राज हा भिलवडीमध्ये राहायला होता. तो भिलवडी येथील खासगी मराठी प्राथमिक शाळेत इयत्ता पहिलीमध्ये शिक्षण घेत होता. शाळा सुटल्यानंतर आईसोबत घरी परतत असताना माळवाडीहून भिलवडीकडे येणाऱ्या डंपर चालकाचा ताबा सुटल्याने डंपरने सरळी पुलाजवळ थेट राजला चिरडले. या अपघातात त्याचा जागीच मृत्यू झाला.

घटनेनंतर इनामुल सुतार यांनी गंभीर जखमी अवस्थेतील राजला तातडीने दवाखान्यात दाखल केले. मात्र डॉक्टरांनी तपासणीअंती त्याला मृत घोषित केले होते. या दुर्दैवी घटनेने संपूर्ण भिलवडी गावावर शोककळा पसरली आहे. निष्पाप बालकाच्या अकाली जाण्याने सर्वत्र हळहळ व्यक्त केली जात आहे. भिलवडी पोलीस ठाण्याचे अधिकारी अपघातानंतर पसार झालेल्या डंपर चालकाचा शोध घेत आहेत. पोलिसांचा या प्रकरणी अधिक तपास सुरू आहे.

पुण्यात बसचा अपघात

पुण्यात पीएमपी बसचा अपघात झाला आहे. पुण्यातील दोन बस एकमेकांना धडकल्या. गणपती माथा येथे बस वळवताना पीएमपी बसला मागून दुसऱ्या पीएमपी बसची धडक बसली. या अपघातात एका बसच्या पाठीमागच्या काचा फुटल्या. सुदैवाने दोन्ही बसमध्ये प्रवासी नसल्याने कोणीही जखमी झालं नाही. या बस अपघातानंतर वाहतूक कोंडी झाली.