Sambhajinagar News : बस चालक- वाहकाला जबर मारहाण; संभाजीनगरातील घटना, कर्मचाऱ्यांनी केला चक्काजाम

छत्रपती संभाजीनगर : छत्रपती संभाजीनगर शहरातील मुख्य बसस्थानकामध्ये महामंडळाच्या बस चालक आणि वाहकाला एका कारचालकाने जबर मारहाण केली. बसस्थानकापासून काही अंतरावर हा प्रकार घडल्यामुळे एसटी कर्मचाऱ्यांनी जवळपास तासभर चक्काजाम आंदोलन केले. 

छत्रपती संभाजीनगर (Sambhajinagar) मुख्य बसस्थानकातून जाफराबाद- पुणे बस बाहेरगावी जाण्यासाठी मार्गस्थ झाली होती. बस बाहेर निघाली असताना बसस्थानका जवळील बिल कॉर्नर चौकामध्ये सिग्नलवर एका कार चालकाने बसच्या समोर गाडी आडवी लावून अरेरावी करण्यास सुरवात केली. यानंतर कंडक्टर आणि ड्रायव्हर दोघांनाही जबर मारहाण (Crime News) केल्यानंतर ते दोघेही बसस्थानकामध्ये आले. अचानक घडलेल्या या प्रकारामुळे मात्र गोंधळ निर्माण झाला होता. 

दरम्यान हा प्रकार समजल्यानंतर महामंडळाच्या सर्व कर्मचाऱ्यांनी निषेध व्यक्त करत बसस्थानकात चक्का जाम आंदोलन सुरू केले. त्यानंतर पोलीस आणि वरिष्ठ अधिकाऱ्यांनी जो कोणी व्यक्ती आहे. त्याच्यावर कठोर कारवाई केली जाईल; असे आश्वासन दिल्यानंतर एसटी कर्मचारी संघटनांनी चक्काजाम मागे घेऊन बस सेवा सुरळीत सुरू ठेवली आहे.