दुःखद! घराला आग लागून वयोवृद्ध महिलेचा होरपळून जागीच मृत्यू!

अहमदनगर : अहमदनगरच्या राहुरी तालुक्यातील चिंचाळे येथे घराला आग लागून आगीमध्ये वयोवृद्ध महिलेचा होरपळून मृत्यू झाल्याची धक्कादायक घटना घडली. या घटनेमुळे परिसरात हळहळ व्यक्त केली जात आहे. मिळालेल्या माहितीनुसार, चिंचोळे गावातील शिवराम पारधे व त्यांची पत्नी नेहमीप्रमाणे सकाळी मोलमजुरी करण्यासाठी शेतात गेले होते. दरम्यान, स्वयंपाक करून झाल्यानंतर चुलीमध्ये थोडासा विस्तव राहिल्याने भर दुपारी चुलीत असलेल्या लाकडाने पेट घेतला.

हे देखील पाहा :

पाहता पाहता या आगीने रौद्र रूप धारण केले. तसेच धुराचे लोळ मोठ्या प्रमाणात घरामध्ये तयार झाले. घरामध्येच शिवराम पारधे यांच्या वयोवृद्ध आई अनुसाया पारधे (वय 78) आणि तीन लहान मुले घरात होती. आग लागल्यानंतर या चिमुकल्यांनी घरातून पळ काढला. मात्र, अनुसया आजींना बाहेर पडता आले नाही. आगीत होरपळत असताना आजीने जोरजोरात आवाज दिला. पण, घराशेजारील सर्वच जण मोलमजुरी करणारे असल्याने शेतात कामाला गेले होते. आजीचा आवाज कोणालाही ऐकायला गेला नाही व त्यांना घराबाहेर पडताही आले नाही. त्यांचा या आगीत होरपळून जागीच मृत्यू झाला. या घटनेने परिसरात हळहळ व्यक्त केली जात आहे.