Maharashtra Politics : फलटणमध्ये महायुतीत फूट? अजित पवार गटाचे मोठे नेते तुतारी फुंकण्याच्या तयारीत

ओंकार कदम, सातारा, साम टीव्ही प्रतिनिधी

फलटणमध्ये महायुतीत फूट पडलेली पाहायला मिळत आहे. भाजपचे माजी खासदार रणजीतसिंह नाईक निंबाळकर आणि अजित पवार गटाचे राष्ट्रवादीचे ज्येष्ठ नेते रामराजे नाईक निंबाळकर यांच्यामध्ये लोकसभा निवडणुकीपासून शाब्दिक वार सुरू आहे. दरम्यान भाजपच्या रणजीत नाईक निंबाळकर आणि जयकुमार गोरे यांच्याविषयी असणाऱ्या तक्रारीची दखल न घेतल्यास यापुढील काळात तुतारी हातात घेऊ, असा इशारा माजी विधान परिषद सभापती रामराजे नाईक निंबाळकर यांनी दिला आहे.

आज फलटण येथे आयोजित केलेल्या एका बैठकीत रामराजे नाईक निंबाळकर यांनी भाजपच्या रणजीत नाईक निंबाळकर यांच्या विषयी अजित पवार यांच्याकडे तक्रार करणार असल्याचं ते म्हणाले आहेत. गल्लोगल्ली दहशत करणाऱ्या रणजीतसिंह नाईक निंबाळकर आणि त्यांच्या सोबत असणाऱ्या आमदार जयकुमार गोरे यांच्या विषयी आमची तक्रार आहे. त्यांना भाजपने साथ देऊ नये. अन्यथा आम्ही तुतारी हातात घेऊ असा इशारा माजी विधान परिषद सभापती रामराजे नाईक निंबाळकर यांनी महायुतीतील वरिष्ठांना दिला आहे.

आम्ही कधी दोन समाजात देढ निर्माण करत नाही, आमची तक्रार फक्त जे गल्लोगल्ली दहशत पसरवतायेत त्यांच्या विषयी आहे. त्यांच्या दहशतीला भाजपने साथ देऊ नये एवढीच आमची इच्छा आहे. तेवढ त्यांना सांगून बघू. तुम्ही तयारीने या महिला येऊ देत आणि एक तास वेगळा कार्यक्रम घेऊ आणि विषय संपवून टाकू. आणि जर काही फरक पडला नाही, तर आपल्याला तुतारी वाजवायला किती वेळ लागतो, असं विधान रामराजे नाईक निंबाळकर यांनी केलं आहे.