Maharashtra IMD Alert: राज्यात आज अतिमुसळधार पावसाचा इशारा; तब्बल १९ जिल्ह्यांना यलो अलर्ट

सध्या राज्यातील अनेक भागात मुसळधार पाऊस सुरू आहे. पण काही जिल्ह्यात अद्यापही चांगल्या पावसाची गरज आहे.

दरम्यान, काही भागात मुसळधार पाऊस झाल्याने पूरस्थिती निर्माण झाली आहे. परिणामी जनजीवन विस्कळीत झालं आहे.

काही जिल्ह्यांमध्ये पूरस्थिती निर्माण झाल्यानं पुराचं पाणी शेतात शिरलं आहे. शेकडो एकर शेती या पाण्यामुळं खरडून गेली आहे.

मुंबईसह उपनगर ठाणे पालघर परिसरात जोरदार पावसामुळं वाहतुकीवर परिणाम झाला आहे. दरम्यान, आज म्हणजेच शनिवारी सुद्धा राज्यात जोरदार पावसाची शक्यता आहे.

आज कोकणासह पश्चिम महाराष्ट्रातील काही जिल्ह्यात पावसाचा यलो अलर्ट देण्यात आला आहे. यामध्ये रायगड, रत्नागिरी, सिंदुधुर्ग या जिल्ह्यांसह ठाणे आणि पालघर जिल्ह्याचा समावेश आहे.

तर पश्चिम महाराष्ट्रातील पुणे आणि सातारा आणि संपूर्ण विदर्भात आज पावसाचा यलो अलर्ट जारी करण्यात आला आहे.

राज्यातील एकूण १९ जिल्ह्यांना पावसाचा यलो अलर्ट देण्यात आला आहे. मुसळधार पावसाच्या पार्श्वभूमीवर नागरिकांनी योग्य ती खबरदारी घ्यावी, असं आवाहन करण्यात आलं आहे.

दुसरीकडे मुंबईसह उपनगरात शुक्रवारी पावसाचा जोर कमी झाला. मात्र, आज हवामान खात्याकडून मुसळधार पावसाचा इशारा देण्यात आला आहे.