Raigad Accident : प्रवाशांनी खचाखच भरलेल्या बसला ताम्हिणी घाटात अपघात, ५ ते ६ जण गंभीर जखमी

रायगडमध्ये एका खासगी बसचा भीषण अपघात झाला आहे. पुण्याहून माणगावच्या दिशेने येताना गाडीवरील नियंत्रण सुटल्याने बस रस्त्यावरून खाली उतरली. या दुर्घटनेवेळी बसमध्ये २० प्रवासी प्रवास करत होते. दरम्यान या सगळ्या प्रवाशांना दुखापत झाली आहे. त्यामधील ५ ते ६ जणांना गंभीर दुखापत झाली आहे. त्यांच्यावर जवळच्या रुग्णालयात उपचार सुरु आहेत. पोलीस या दुर्घटनेचा अधिक तपास करत आहेत.

मिळालेल्या माहितीनुसार, पुण्याहून एक खासगी बस माणगावच्या दिशेने येत होती. या बसमधून २० प्रवासी प्रवास करत होते. ही बस ताम्हिणी घाटात येताच बसचालकाचा गाडीवरील ताबा सुटला. ही बस रस्त्यावरून खाली उतरून आदळली. मात्र सुदैवाने चालकाच्या तत्परतेने कोणतीही जीवित हानी झालेली नाही. मात्र गाडीचे मोठ्या प्रमाणावर नुकसान झाले असून गाडीचा पुढच्या भागाचा चक्काचूर झाला आहे.

ताम्हिणी घाट हा वळणावळणाचा असल्याने, हा घाट अपघात प्रवण क्षेत्रात येतो. दरम्यान या अपघातात २० जण जखमी झाले असून ५ ते ६ जण गंभीर जखमी झाले आहेत. अपघाताची माहिती मिळताच पोलिसांनी तातडीने घटनास्थळी धाव घेतली. जखमींना स्थानिकांच्या मदतीने रुग्णालयात उपचारासाठी पाठवण्यात आले आहे. हा अपघात कसा झाला? चालक गाडी चालवताना मद्यधुंद होता का ? याचा तपास पोलीस करत आहेत.