Ganesh Visarjan Rally : विसर्जन मिरवणुकीत लेझर लाईट, डीजे, डॉल्बीवर बंदी; रायगड जिल्हाधिकाऱ्यांचे आदेश

सचिन कदम

रायगड : सध्या गणेशोत्सव सुरु असून गणेश भक्तांचा उत्साह देखील शिगेला पोहचला आहे. या गणेशोत्सवात अनेक जिल्ह्यामध्ये डीजे, डॉल्बी व लेझर लाईट वापरावर बंदी घालण्यात आलेली आहे. त्यानुसार आता गणेश विसर्जन मिरवणुकीत लेझर लाईटच्या वापरावर रायगडमध्ये बंदी घालण्यात आली आहे. रायगडचे जिल्हाधिकारी किसन जावळे यांनी तसे आदेश जारी केले आहेत.  

लाडक्या गणरायाचे स्वागत करताना मोठ्या मंडळांकडून स्वागत मिरवणुका काढण्यात आल्या होत्या. यात डीजेचा वापर करण्यात आला होता. मात्र यामुळे होणार त्रास लक्षात घेता राज्यात अनेक ठिकाणी या उत्सवाच्या काळात डीजे वापरण्यावर बंदी करण्यात आली आहे. तर काही ठिकाणी लेझर लाईटचा वापर देखील करण्यास मनाई आहे. तर आता गणेश विसर्जन मिरवणुकीत देखील याचा वापर होण्याची शक्यता असल्याने रायगड जिल्हाधिकारी यांनी बंदीचे आदेश काढले आहेत. 

मिरवणुकीत यावर असणार बंदी  

लेझर लाईटची तिव्रता आणि त्याचे डोळे आणि आरोग्यावर होणाऱ्या दुष्परिणामांच्या पार्श्वभूमीवर हि बंदी घलण्यात आली आहे. गणेशोत्सव आता शेवटच्या टप्प्यात असून पाच दिवस, सात दिवसांच्या गौरी गणपती आणि अनंत चतुर्दशीच्या विसर्जन मिरवणूका मोठ्या प्रमाणात निघणार आहेत. यावेळी गणेश मंडळ आणि आयोजकांनी मिरवणुकांदरम्यान लेझर लाईट, ध्वनीक्षेपकांचा दणदणाट, डॉल्बी, स्नो/हिट स्प्रे याचा वापर करून नये असे निर्देश दिले आहेत.  

तर होणार कायदेशीर कारवाई 

दरम्यान विसर्जन मिरवणुकीत होणार डीजेचा वापर करण्यावर बंदी करण्यात आली आहे. या ऐवजी ढोल- ताशांचा वापर मंडळांना करावा लागणार आहे. मिरवणुकीत डीजे किंवा लेझर लाईटचा वापर करून बंदीचे उल्लंघन करणाऱ्यांवर भारतीय न्याय संहितेतील तरतुदीनुसार संबधित दोशींवर कायदेशीर कारवाई केली जाणार असल्याचा इशारा जिल्हाधिकाऱ्यांनी आपल्या आदेशातुन दिला आहे.