Suspicious Boat : रायगड संशयित बोट प्रकरणात महत्त्वाचा खुलासा, पाकिस्तानवरुन वाहून आलेली संशयित वस्तू...

सचिन कदम, साम टीव्ही, प्रतिनिधी

Raigad : रायगडमधील मुरूडच्या कोलेई समुद्रकिनारी संशयित बोट आढळली होती. पाकिस्तानमधून ही बोट भारतात आल्याचे म्हटले जात होता. आता या बोटीसंदर्भात महत्त्वपूर्ण खुलासा झाला आहे. ही बोट नसून फ्लोटींग बोया असल्याचे स्पष्ट झाले आहे. ही माहिती समोर आल्याने सुरक्षा यंत्रणांनी सुटकेचा नि:श्वास सोडला आहे.

मिळालेल्या माहितीनुसार, कोलेई समुद्रकिनारी आढळून आलेली बोट नसल्याचे स्पष्ट झाले आहे. ती संशयास्पद वस्तू म्हणजे मासेमारीसाठी वापरण्यात येणारा बोया असल्याचे समोर आले आहे. तटरक्षक दलाच्या शोधमोहीमेत ही बाब स्पष्ट झाली असून रायगड पोलिसांनी याबाबतचा खुलासा केला आहे. यामुळे सुरक्षा यंत्रणांसह सर्वांनीच सुटकेचा निःश्‍वास सोडला आहे.

मच्छीमार, कोळीबांधव जेव्हा मासेमारी करण्यासाठी समुद्रात जातात, तेव्हा जाळी बुडून जाऊ नये यासाठी फ्लोटींग बोयाचा वापर केला जातो. हा फ्लोटींग बोया पाकिस्तानहून भारतीय समुद्र हद्दीत वाहून आलेला आहे. अशाच प्रकारचा पाकिस्तानी फ्लोटींग बोया जानेवारी महिन्यात गुजरातच्या ओखा किनाऱ्यावर आढळून आला होता.

काल रात्री संशयित पाकिस्‍तानी बोट कोर्लई जवळच्‍या समुद्रात आली असल्‍याचा संदेश तटरक्षक दलाने दिला होता. त्‍यानंतर सुरक्षा यंत्रणांची धावपळ उडाली होती. आता मात्र ती बोट नसून फ्लोटींग बोया असल्‍याचे निष्‍पन्‍न झाल्‍याने सर्वांचे टेन्शन कमी झाले आहे. ही बोया पाकिस्तानमधून वाहून भारतातील कोलेई समुद्रकिनारी वाहून आली.