Raigad : डिश रिपेअरिंगसाठी घरात घुसले, सोन्याचे दागिन्यांकडे मन वळलं, नंतर अल्पवयीन तरुणांचं वृद्ध महिलेसोबत धक्कादायक कृत्य

सचिन कदम, साम टीव्ही, प्रतिनिधी

Raigad News : रायगड जिल्ह्यातून एक धक्कादायक प्रकार उघडकीस आला आहे. रायगडमध्ये दोन अल्पवयीन मुलांना एका वृद्ध महिलेची गळा दाबून हत्या केली आहे. महिलेच्या कानातील आणि गळ्यातील सोन्याचे दागिने चोरण्यासाठी त्यांनी महिलेचा गळा आवळल्याचे प्राथमिक तपासात समोर आले आहे. या घटनेमुळे परिसरात खळबळ उडाली आहे.

मिळालेल्या माहितीनुसार, डिश रिपेअरिंगसाठी घरी आलेल्या दोन अल्पवयीन मुलांनी वृद्ध महिलेची हत्या केली. महिलेच्या अंगावरील दागिने लपास करुन ते दोघे पसार झाले. मृत्यू नैसर्गिक वाटावा यासाठी त्यांनी महिलेला झोपवून आरोपी पळून गेले. ही घटना रायगड जिल्ह्यातील म्हसळा तालुक्यात घडल्याचे म्हटले जात आहे.

शेवंता भावे (वय ८० वर्षे) असे मृत वृद्ध महिलेचे नाव आहे. महिलेच्या कुटुंबीयांनी ती घरात मृत अवस्थेत आढळली. तिचा मृतदेह अंत्यसंस्कारासाठी स्मशानभूमीत नेण्यात आला. तेव्हा अंत्यसंस्कारादरम्यान महिलेच्या अंगावर दागिने नसल्याबाबत चर्चा सुरु झाली. अंत्यसंस्कारानंतर वृद्धेच्या नातलगांनी पोलीस ठाणे गाठले.

पोलिसांनी वृद्ध महिलेच्या दागिन्यांचा तपास केला. त्यावेळेस घडलेल्या प्रकाराच खुलासा झाला. पोलिसांनी मुद्देमालासह दोन्ही अल्पवयीन मुलांना ताब्यात घेतले आहे. या प्रकरणी भारतीय न्याय संहिताचे कलम १०३, ३११, ३ (५) प्रमाणे गुन्हा नोंदवण्यात आला आहे. आरोपी मुलांना कर्जत येथील बालसुधारगृहात रवाना करण्यात आले आहे.