Raigad Politics : गोगावलेंचा तटकरेंना जोरदार धक्का, कट्टर नेत्याचा शिवसेनेत प्रवेश

Vikas Gaikwad joins Shiv Sena Raigad latest news : स्थानिक स्वराज्य संस्थांच्या निवडणुकीचे बिगुल काही दिवसातच वाजणार आहे. निवडणुकीआधी राजकीय पक्षांकडून आकड्याची जुळवाजुळव केली जात आहे. गेल्या काही दिवसांपासून अनेक विरोधकांनी सत्ताधारी पक्षात जाहीर प्रवेश केला आहेच. पण आता सत्ताधारी राष्ट्रवादी काँग्रेसला जोरदार धक्का बसला आहे. रायगडमध्ये शिवसेनेचे आमदार भरत गोगावले यांनी राष्ट्रवादी काँग्रेसच्या सुनील तटकरेंना जोरदार धक्का दिला आहे. तटकरेंचा कट्टर समर्थक अन् राष्ट्रवादीचा नेत्याचा शिवसेनेत प्रवेश झाला आहे. (Bharat Gogawale Vs Aditi Tatkare Raigad Politics News)

मंत्री भरत गोगावले यांनी राष्ट्रवादी प्रदेशाध्यक्ष सुनिल तटकरे यांना गोरेगाव लोणेरे जिल्हा परिषद मतदार संघात मोठा धक्का दिला आहे. तटकरे यांचा कट्टर समर्थक, कार्यकर्ता अन् स्थानिक नेता विकास गायकवाड याने आपल्या असंख्य कार्यकर्त्यांसह शिवसेनेत जाहीर प्रवेश केला आहे. आगामी जिल्हा परिषद आणि पंचायत समिती निवडणुकांच्या पार्श्वभूमीवर हा प्रवेश महत्वपूर्ण मानला जात आहे. या प्रवेशामुळे ऐन जिल्हा परिषद निवडणुकांच्या तोंडावर गोरेगाव विभागात राष्ट्रवादी काँग्रेसला खिंडार पडले आहे. मंत्री भरत गोगावले , जिल्हाप्रमुख प्रमोद घोसाळकर यांच्या उपस्थितीत हा प्रवेश पार पडला. मंत्री भरत गोगावले यांचा हा दिवाळी धमाका मानला जातोय.

पुढील काही दिवसात राज्यात स्थानिक स्वराज्य संस्था होणार आहे. रायगडमध्ये शिवसेना आणि राष्ट्रवादी काँग्रेस या दोन सत्ताधारी पक्षामध्ये वर्चस्वाची लढाई लागणार आहे. या दोन पक्षामध्येच खरी लढत असल्याचे रायगडमध्ये बोलले जात आहे. तटकरे अन् गोगावले यांच्यातील संघर्ष रायगड अन् महाराष्ट्रासाठी नवीन नाही. गेल्या काही वर्षांपासून या दोन दिग्गजांमध्ये आरोप-प्रत्यारोपाच्या फैरीही झडल्या जात आहेत. आता शिवसेनेकडून राष्ट्रवादीला मोठा हादरा दिलाय. तटकरेंकडून यावर अद्याप अधिकृत प्रतिक्रिया आलेली नाही. पण स्थानिक स्वराज्य संस्थांच्या निवडणुकीआधी हा तटकरेंना मोठा धक्का मानला जातोय.