Pune Swargate ST Depot Case : दत्ता गाडेच्या मोबाईलचा शोध सुरु, लवकरच सत्य समोर येणार

सागर आव्हाड, साम टीव्ही, प्रतिनिधी

Dattatray Gade : स्वारगेट बस डेपोमधील बलात्कार प्रकरणातील आरोपी दत्तात्रय गाडेची चौकशी सुरु आहे. पण गाडेचा मोबाईल अद्याप पोलिसांच्या हाती लागलेला नाही. मोबाईलबाबत गाडेला विचारल्यास तो उडवाउडवीची उत्तरे देत असल्याचे पोलिसांनी म्हटले आहे. त्यामुळे दत्ता गाडेचा मोबाईल शोधण्यासाठी पोलीस पुन्हा शेतात जाणार आहेत.

पुण्याच्या स्वारगेट बस डेपोमध्ये तरुणीवर अत्याचार करुन आरोपी दत्ता गाडे फरार झाला होता. तो शिरूरच्या गुनाट गावात जाऊन लपला होता. ऊसाच्या शेतात लपून बसलेल्या दत्ता गाडेला शोधण्यासाठी पुणे पोलिसांनी मोठे सर्च ऑपरेशन केले होते. त्यानंतर मध्यरात्री पोलिसांनी दत्तात्रय गाडेला ताब्यात घेतले होते.

आरोपी दत्ता गाडेच्या मोबाईलमध्ये गुन्ह्याशी संबंधित महत्त्वाचे पुरावे असू शकतात. फोनमधील कॉल रेकॉर्ड, मेसेज, लोकेशन डेटा आणि इतर डिजिटल माहिती आरोपीच्या हालचालींबाबत अधिक माहिती मिळवून देऊ शकतात. त्यामुळे दत्तात्रय गाडेच्या मोबाईलचा शोध घेण्यावर पोलीस भर देत आहेत.

दत्ता गाडे ज्या-ज्या ठिकाणी लपून बसला होता, त्या प्रत्येक ठिकाणी पोलीस मोबाईलचा शोध घेणार आहेत. आरोपीची डीएनए चाचणी पूर्ण झाली आहे. ज्या रिकाम्या बसमध्ये ही घटना घडली त्या बसची देखील फॉरेन्सिक चाचणी झाली आहे. प्राथमिक तपासात गाडेने त्याचा फोन गुनाट गावातल्या शेतात फेकल्याचे सांगितले. आता गुन्हे शाखेचे पथक त्या परिसरात जाऊन मोबाईलचा शोध घेणार आहेत.