Shirur News: वडिलोपार्जित जमिनीसाठी एकमेकांच्या जीवावर उठले, दोन गटांत तुंबळ हाणामारी; थरकाप उडवणारा VIDEO

रोहिदास गाडगे, शिरूर

शिरूरमध्ये वडिलोपार्जित जमिनीसाठी दोन गटामध्ये तुंबळ हाणामारी झाली. दोन गट आमने-सामने येत महिला आणि पुरूषांनी अक्षरश: दगडाच्या सहाय्याने आणि लाथाबुक्क्या मारत एकमेकांना मारहाण केली. शिक्रापूरमधील कन्हूर मेसाई येथे ही धक्कादायक घटना घडली. या घटनेचा व्हिडीओ समोर आला असून तो व्हायरल होत आहे. वडिलोपार्जित जमिनी अक्षरश: हे सर्वजण एकमेकांच्या जीवावर उठले. याप्रकरणी शिक्रापूर पोलिसांनी दोन्ही गटांतील महिलांसह १४ जणांवर परस्परविरोधी गुन्हे दाखल केले आहेत.

मिळालेल्या माहितीनुसार, कन्हूर मेसाई येथील पांडुरंग अनंता पुंडे यांच्या वडिलोपार्जित जमिनीसंबंधी बहिणीसोबत वाद सुरू आहे. ही जमीन न्यायप्रविष्ट असताना नाथा बबन उमाप हे त्यांच्या कुटुंबातील महिलांना आणण्यासाठी त्या जमिनीतून जात होते. त्यावेळी पुंडे आणि उमाप गटांमध्ये शाब्दिक वादातून तुंबळ हाणामारी झाली. दरम्यान, दोन्ही गटांनी एकमेकांवर दगड आणि लाकडी दांडक्यांनी हल्ला करत मारहाण केली. यामध्ये अनेकजण जखमी झाले.

याप्रकरणी नाथा बबन उमाप (वय ३७ वर्षे रा. जातानग बुद्रुक, ता. शिरूर, जि. पुणे) यांनी शिक्रापूर पोलिस ठाण्यात फिर्याद दिली. त्यांनी दिलेल्या तक्रारीवरून पोलिसांनी नाथा बबन उमाप, सोमनाथ अंकुश मुरकुटे, बेबनाबाई बबन उमाप, साविता दत्तात्रय शिवले, विक्रम उमाप, समीम उमाप, रोहन शिवले यांच्याविरोधात गुन्हा दाखल केला आहे.

तसेच, पांडुरंग अनंता पुंडे (वय ६५, रा. कन्हूर मेसाई, ता. शिरूर), अनिकेत पुंडे, अनिल पुंडे, सुमन पुंडे, साईली पुंडे, स्वाती अनिल पुंडे, उच्चवाणी पुंडे (सर्व रा. कन्हूर मेसाई) आणि बापू धुमाळ यांच्या विरोधातही परस्परविरोधी गुन्हे दाखल करण्यात आले आहेत. या प्रकरणाचा तपास शिक्रापूर पोलिस ठाण्याचे उपनिरीक्षक विजय चौधरी यांच्या मार्गदर्शनाखाली पोलिस हवालदार संतोष शेंबडे करत आहेत.