अजितदादा आम्हाला न्याय द्या...; तुमच्या एका आमदारामुळे राज्य नासत चाललंय, अश्रूंच्या धारांसह वैभवीची आर्त हाक

मंगेश कचरे, साम टिव्ही

पुणे (बारामती) : बीडमधील मस्साजोगचे दिवंगत सरपंच संतोष देशमुख यांची मुलगी वैभवी हिने आज रविवारी बारामतीमध्ये झालेल्या आक्रोश मोर्चानंतर उपमुख्यमंत्री अजित पवार यांच्याकडे न्याय देण्याची मागणी केली आहे. माध्यमांशी संवाद साधताना वैभवीने आर्त हाक देत आपल्या भावना व्यक्त केल्या आहेत.

वैभवी म्हणाली, अजितदादा..माझे वडील गेले आहेत, आम्ही न्याय मागतोय. आम्हाला लवकरात लवकर न्याय द्या. या प्रकरणाची सखोल चौकशी करा. तुमच्या पक्षातील एका आमदारामुळे आज राज्य नासत चाललंय. ते जे करत आहेत त्यामुळे आमच्यासारख्या सर्वसामान्यांना जगणं मुश्किल होत चाललं आहे. उपमुख्यमंत्री अजित पवार हे खऱ्याला खरे आणि खोट्याला खोटे म्हणणारे व्यक्तिमत्व आहे. त्यांच्याकडे मी न्यायाची मागणी करते. आमच्या भागात अनेक गंभीर प्रकरणं घडली आहेत, त्याचीही सखोल चौकशी व्हावी अशी मागणी वैभवीने यावेळी केली.

माजी मंत्री धनंजय मुंडे यांच्याबाबत वैभवी देशमुख म्हणाली, आमची पहिल्यापासूनच एकच भूमिका आहे ती म्हणजे माझ्या वडिलांना न्याय मिळाला पाहिजे. खंडणीमुळे माझ्या वडिलांची हत्या झाली. ती खंडणी नेमकी कोणाकडे जाते, हा सुद्धा आम्हाला पडलेला एक प्रश्न आहे. माझ्या वडिलांसंबंधी घटना घडलेली असताना जिल्ह्यात अजूनही काही घटना घडत आहेत. वडिलांच्या हत्येचे जे फोटो व्हायरल केले जात आहेत, त्यात मृतदेह समोर असतानाही आरोपी कसा अमानुष छळ करत आहेत, हे दिसून येते. या मागे निश्चित कोणाचा तरी हात, मोठा पाठींबा आहे. आज तीन महिने झाले महाराष्ट्र न्यायासाठी आस लावून बसला आहे, अशी आर्त हाक वैभवी देशमुख हिने दिली आहे.