Prakash Ambedkar: मुख्यमंत्र्यांच्या भेटीत नेमंक काय घडलं, शिंदे गटासोबत युती होणार का? प्रकाश आंबेडकरांनी केली मोठी घोषणा

Prakash Ambedkar News: वंचित बहुजन आघाडीचे नेते प्रकाश आंबेडकर यांनी काल रात्री मुख्यमंत्री एकनाथ शिंदे यांची भेट घेतली होती. या भेटीनंतर राजकीय वर्तुळात मोठी चर्चा रंगली होती. त्याचबरोबर प्रकाश आंबेडकर शिंदे गटासोबत युती करणार, अशाही बातम्या राजकीय वर्तुळात सुरू होत्या.

आता स्वतः प्रकाश आंबेडकर (Prakash Ambedkar) यांनी एकनाथ शिंदेंच्या भेटीबाबत खुलासा केला आहे. ज्यामध्ये त्यांनी नेमकं या भेटीत काय झालं याबद्दलही खुलासा केला आहे.

याबाबत समोर आलेल्या माहितीनुसार मुख्यमंत्री एकनाथ शिंदे यांच्या भेटीबद्दल प्रकाश आंबेडकर यांनी महत्वाचा खुलासा केला आहे. यावेळी ते म्हणाले की, जे पक्ष भाजपासोबत युतीत आहेत अशा कोणत्याही पक्षाशी आम्ही युती करणार नाही, आमची आणि शिवसेना पक्षाची युती होणार आहे. याबद्दल मी एकनाथ शिंदेंनाही सांगितले आहे.

त्याचबरोबर याबद्दल पुढे बोलताना ते म्हणाले की, या भेटीत बऱ्याच गोष्टींवर चर्चा झाली, नाही असे नाही. मात्र भाजपासोबत असणाऱ्या पक्षासोबत आम्ही जाणार नाही. याबद्दल कोणत्याही परिस्थितीत समझौता होणार नाही, आम्ही शिवसेनेसोबत युती करणार आहोत. त्याचबरोबर शिंदेनी भाजपा सोडली तर पुढचा विषय होऊ शकतो, असेही वक्तव्य प्रकाश आंबेडकर यांनी केले आहे.

दरम्यान, काल मध्यरात्री प्रकाश आंबेडकर यांनी एकनाथ शिंदेची( Eknath Shinde) भेट घेतल्यानंतर राजकीय वर्तुळात चर्चा रंगल्या होत्या. यावर खुद्द प्रकाश आंबेडकर यांनीच खुलासा केल्याने या चर्चांना पुर्णविराम मिळाला आहे.