Sanjay Shirsat : ठाकरे गटाचे आमदार आमच्या संपर्कात; संजय शिरसाट यांचा मोठा दावा

रामू ढाकणे

Sanjay Shirsat News :

मुख्यमंत्री एकनाथ शिंदे विचार करून निर्णय घेत आहेत. आम्ही शिवसेना प्रमुखांचे शिवबंधान बांधतो, तिकडच्यांसारखे गंडा, दोरे बांधत नाही. ठाकरे गटाचे 'माझे कुटुंब माझी जबाबदारी' सोडून सगळे आमदार आमच्या संपर्कात आहेत, असा खळबळजनक दावा शिवसेना प्रवक्ते आमदार संजय शिरसाट यांनी केला आहे.

राज्यात लोकसभा निवडणुकांची जोरदार तयारी सुरू असताना काही जागांसाठी भाजपकडून शिंदेंवर दबाव आणला जात असल्याची चर्चा आहे. या चर्चेवर बच्चू कडूंनी देखील आज भाष्य केलं. यावर बोलताना तसे काही नसून ठाकरे गटाचे सगळे आमदार आमच्या संपर्कात आहेत, असा दावा संजय शिरसाट यांनी केला आहे.

मुख्यमंत्री शिंदे सर्वसामान्य कुटुंबातून आहेत. अनेक संकटांना त्यांनी तोंड दिले आहे. काही लोक जे काही बोलतात त्यात शिंदेंनी समंजस भूमिका घेतलीये. आम्हाला भाजप दाबतेय का? आमचा बळी घेणार का? या सगळ्या चर्चा दुर्दैवी आहेत, असं माध्यमांशी संवाद साधताना शिरसाट म्हणाले.

बच्चू कडूंनी काही भावना व्यक्त केल्या असाव्यात. मात्र, असे काही घडणार नाही. त्यांच्या वक्तव्याला महत्व निश्चित आहे. मात्र ती त्यांची भावना असेल. उद्या दुसऱ्या टप्प्याची अखेरची अर्ज करण्याची तारीख आहे. राहिलेल्या नावांची घोषणा आज करण्यात येईल, असंही यावेळी शिरसाटांनी सांगितलं.