Parbhani: छत्रपती संभाजी महाराजांचं स्टेटट्स ठेवल्यामुळे तरूणाला घेरलं, शर्ट फाडलं, लाथाबुक्क्यांनी तुडवलं, परभणीत खळबळ

विशाल शिंदे, साम टीव्ही

सध्या राज्याचं वातावरण औरंगजेबाच्या कबरीवरून तापलं आहे. अशातच परभणीतील गंगाखेडमधून एक धक्कादायक बातमी समोर येत आहे. इन्स्टाग्रामवर छत्रपती संभाजी महाराज यांची फोटो स्टोरी ठेवल्यामुळे एका युवकाला बेदम मारहाण करण्यात आली आहे. शर्ट फाटेपर्यंत लाथाबुक्क्यांनी तरूणाला मारहाण करण्यात आली आहे. या घटनेनंतर काही काळ परिसरात ताणावाचे वातावरण निर्माण झाले होते. या प्रकरणी पोलिसांनी ८ आरोपींविरोधात गुन्हा दाखल केला आहे.

परभणीतील गंगाखेड शहरातील नगरेश्वर गल्लीत एका युवकाला बेदम मारहाण करण्यात आली आहे. अभिषेक खडवे (वय वर्ष २२) असे तरूणाचे नाव आहे. अभिषेकने आपल्या इन्स्टाग्राम स्टोरीवर छत्रपती संभाजी महाराज यांचा फोटो ठेवला होता.

फोटोमध्ये छत्रपती संभाजी महाराज यांच्या हातात तलवार आहे. तर, त्यांच्या पायाखाली औरंगजेब दिसत आहे. हा स्टेटस ठेवल्यानंतर अभिषेकला गल्लीत काही लोकांनी घेरलं. ७ ते ८ जणांनी मिळून त्याला अमानूष मारहाण केली.

या मारहाणीत त्याचं शरीर काळं निळं पडलं. शर्ट फाटेपर्यंत त्याला मारलं. या घटनेची माहिती मिळाल्यानंतर पोलिसांनी घटनास्थळी धाव घेतली. अभिषेकने पोलीस ठाण्यात दाखल केलेल्या तक्रारीनुसार, पोलिसांनी ८ जणांवर गुन्हा दाखल केला आहे. पोलीस आरोपींचा शोध घेत आहेत.