Parbhani : परभणी जिल्ह्यात पावसाचा कहर; रामपुरी गावात घरामध्ये पाणी, ग्रामस्थांचे जिल्हा परिषद शाळेत स्थलांतर

विशाल शिंदे 

परभणी : राज्यातील अनेक भागात पावसाने धुमाकूळ घातला आहे. परभणी जिल्ह्यात देखील तीन दिवसांपासून सातत्याने पाऊस होत असल्याने पावसाने अक्षरशः कहर केला आहे. यात पाथरी तालुक्यातील रामपुरी गावाला पुराचा वेढा पडला असून संपूर्ण गावात पाणी शिरल्याने घरांमध्ये पाणी गेले आहे. यामुळे नागरिकांना जिल्हा परिषद शाळेत राहण्यासाठी स्थलांतरित करण्यात आले आहे. 

परभणी जिल्ह्यात पावसाने अक्षरशः कहर केला आहे. मागील काही दिवसांपासून सातत्याने पाऊस पडत असल्यामुळे नागरिकांचे जनजीवन विस्कळीत झाले आहे. सातत्याने पाऊस सुरु असल्याने जिल्ह्यातील अनेक भागात पूरस्थिती निर्माण झाली आहे. दरम्यान जिल्ह्यातील पाथरी तालुक्यातील रामपुरी गावात रात्री तीन वाजल्यापासून पाणी घुसल्यामुळे गावात पूरस्थिती निर्माण होऊन अनेकांच्या घरात पाणी शिरले आहे. 

संसार पाण्यात भिजला 

गावात पाणी शिरल्याने अनेकांच्या घरात पाणी शिरले आहे. यामुळे घरातील सामानाचे अतोनात नुकसान झाले आहे. घरातील वस्तू पाण्यावर तरंगत आहेत. तर गावात काही ठिकाणी अक्षरशः पाणीच पाणी झाले आहे. त्यामुळे शेतीसह घराचे मोठ्या प्रमाणात नुकसान झाले आहे. घरातील सर्व वस्तू या पाण्याखाली गेल्या असल्याने संसार पाण्यात भिजल्याचे चित्र सध्या गावात पाहण्यास मिळत आहे.  

नागरिकांना जिल्हा परिषदेत स्थलांतर 

घरांमध्ये पाणी शिरल्याने गावातील काही नागरिक आपले मुलं बाळ घेऊन जिल्हा परिषद शाळेत स्थलांतरित झाले आहेत. गावात अशी परिस्थिती निर्माण झाल्यानंतर देखील गावात ना लोकप्रतिनिधी ना प्रशासकीय अधिकारी पाहणी करण्यासाठी आला आहे. आम्ही स्वतःचा जीव लेकरा बाळांचा जीव वाचवण्यासाठी जिल्हा परिषद शाळेत आसरा घेतल्याचे गावकऱ्यांनी सांगितले.