Satara : फॉलोवर्स वाढविण्यासाठी सोशल मीडियावर अनोखी जाहिरात; महिलांची दुकानात गर्दी, दुकान मालकावर गुन्हा दाखल

सातारा : आपल्या दुकानाची किंवा प्रॉडक्टची माहिती जनतेपर्यंत पोहचविण्यासाठी वेगवेगळ्या माध्यमातून जाहिराती केल्या जात असतात. मात्र सोशल मीडियावर आपले फॉलोवर्स वाढविण्यासाठी सोन्याच्या दुकानाची केलेली अनोखी जाहिरात दुकानदाराच्या अंगलट आली आहे. कारण या जाहिरातीमुळे दुकानात गर्दी झाली आणि नागरिकांसाठी समस्या बनली. या कारणावरून दुकान मालकावर पोलिसात गुन्हा दाखल करण्यात आला आहे. 

सातारा शहरातील गुरुवार पेठ परिसरात असणाऱ्या एका ज्वेलरी दुकानदाराने ग्राहकांना आकर्षित करण्यासाठी आपल्या दुकानाची जाहिरात करण्यास सुरवात केली होती. मात्र सोशल मीडियावर केलेली हि अनोखी जाहिरात त्याच्या चांगलीच अंगलट आली आहे. कारण हि जाहिरात पाहून अनेकांनी दुकानात गर्दी केली. या गर्दीमुळे रस्त्यावरील रहदारीला अडथळा निर्माण झाला होता. यामुळे ट्राफिक जामचा सामना करावा लागत होता. 

सोशल मीडियावर केलेल्या जाहिरातीमध्ये दुकानाचा इन्स्टाग्राम पेज फॉलो करा आणि दुकानाची जाहिरातीची इमेज स्वतःच्या सोशल मीडिया प्लॅटफॉर्मवर ठेवून त्याचे ५० व्ह्यू मिळाले की त्या महिलेला एक ग्रॅम फार्मिंग ज्वेलरी गिफ्ट मोफत देण्याची ही जाहिरात होती. सदरची जाहिरात सातारा शहरात पसरल्यानंतर या दुकानासमोर मोठ्या प्रमाणात महिलांची झुंबड उडाली. या जाहिरातीमध्ये पहिल्या १००० येणाऱ्या महिलांना हे गिफ्ट मिळणार असं लिहिलं होतं.  

दुकान मालकावर गुन्हा दाखल 

मात्र ऐनवेळी परिसरात अचानक महिलांची गर्दी वाढल्यामुळे दुकानासमोर मोठी गर्दी झाली. परिणामी परिसरात मोठी वाहतूक कोंडी झाली. या योजनेची कोणतीही माहिती पोलीस स्टेशनला न दिल्यामुळे सातारा शहर पोलिसांनी घटनास्थळी येऊन संबंधित दुकान मालकाला ताब्यात घेतले. या प्रकरणात पोलीस प्रशासनाला कोणतीही माहिती न देता रस्त्यावर वाहतूक कोंडी केल्याप्रकरणी मालकासह दोन जणांवर शहर पोलीस ठाण्यात गुन्हा दाखल झाला आहे.