Parbhani News : विहिरीचे खोदकाम जेसीबीने; रोहयोच्या संतप्त मजुरांनी पंचायत समितीतच प्राशन केले किटक नाशक

परभणी : रोजगार हमी योजनेअंतर्गत कामे करून मजुरांना काम दिले जात असते. परंतु या योजनेंतर्गत मंजूर असलेल्या (Parbhani) विहिरीचे खोदकाम मजुरांना लावून केले जात नव्हते. यामुळे संतप्त झालेल्या दोन मजुरांनी पंचायत समितीच्या कार्यलयातच विषारी कीटक नाशक प्राशन केल्याचा धक्कादायक प्रकार घडला आहे. या प्रकारामुळे एकच खळबळ उडाली आहे. 

महाराष्ट्र ग्रामीण रोजगार हमी योजनेंतर्गत (Rojgar Hami Yojana) मंजूर विहिरीचे खोदकाम सुरु करण्यात आले होते. मात्र हे काम रोहयोच्या मजुरांमार्फत न करता जेसीबीच्या साह्याने केले जात होते. याबाबत विचारणा करून देखील हाताला काम मिळत नसल्याने संतप्त झालेल्या मानोली येथील दोघांनी पंचायत समिती कार्यालय मानवत येथे किटनाशक औषध प्राशन केल्याचा प्रयत्न केल्याची घटना समोर आली आहे. सदाशिव शिंदे व सुरेश मांडे असे या दोघा मजुरांचे नावे आहेत.  

विषारी द्रव्य घेतल्याने दोघांना अस्वस्थ वाटत असल्याने त्यांच्यावर मानवत रुग्णालयात उपचारासाठी दाखल करण्यात आले असून पुढील उपचारासाठी परभणी रुग्णालयात नेण्यात आले. अचानक घडलेल्या या प्रकारामुळे खळबळ उडाली आहे. दरम्यान गावाचे सरपंच, ग्रामरोजगार सेवक यांच्या अनागोंदी कारभाराला कंटाळून हे पाऊल उचलले असून यास सरपंच व ग्रामरोजगार सेवक जबाबदार असल्याचा आरोप दोघांनी केला आहे.