पांढरगावचा सुपुत्र जवान विष्णू बडे शहीद; गावकऱ्यांनी साश्रुनयनांनी दिला अखेरचा निरोप

परभणी: गंगाखेड तालुक्यातील (Gangakhed Taluka) पांढरगाव येथील विष्णू बडे हे भारतीय सैन्य दलात हवालदार या पदावर कार्यरत होते. सिकंदराबाद येथे उपचारादरम्यान त्यांचा मृत्यू झाल्यामुळे गंगाखेड तालुक्यावर शोककळा पसरली आहे. पांढरगाव येथील विष्णू व्यंकटराव बडे (३८) हे भारतीय सैन्य दलात सिकंदराबाद येथे हवालदार पदावर कार्यरत होते.

डेंगी या आजारामुळे त्यांचा उपचारादरम्यान ८ सप्टेंबर रोजी त्यांचा मृत्यू झाला. आज संत जनाबाई शाळेजवळील राहत्या घरापासून त्यांची अंत्ययात्रा निघाली. या अंतयात्रेत शालेय विद्यार्थी, राजकीय नेते, सामाजिक कार्यकर्ते यांच्यासह नागरिक मोठ्या संख्येने उपस्थित होते.

पाहा व्हिडीओ -

अंत्ययात्रादरम्यान देशभक्तीपर गीत व तिरंगा झेंड्याने शहरवासीयांचे लक्ष वेधून घेतले. मुख्य बाजारपेठेतील व्यापाऱ्यांनी आपली प्रतिष्ठान बंद ठेवून श्रद्धांजली वाहिली. शहरातील गोदावरी नदीच्या काठावर असलेल्या स्मशानभूमीत त्यांच्यावर अंत्यसंस्कार करण्यात आले. यावेळी सैन्य दलातील दोन अधिकाऱ्यांनी पुष्पचक्र वाहून श्रद्धांजली वाहिली.

परभणी पोलीस प्रशासनाच्या वतीने शहीद बडे मानवंदना देऊन श्रद्धांजली अर्पण करण्यात आली. माजी सैनिक संघटनेच्या सर्व माजी सैनिकांनी श्रद्धांजली वाहिली. अंत्यविधीच्या वेळी हजारो उपस्थितांच्या डोळ्यातून अश्रू वाहत होते. विष्णू बडे यांच्या पश्चात आई, वडील, पत्नी, मुलगा, मुलगी, तीन भाऊ असा परिवार आहे. विष्णू बडे यांचा मृत्यू झाल्याबद्दल तालुक्यात हळहळ व्यक्त होत आहे.

Edited By - Jagdish Patil