Madha Vidhan sabha : माढ्यात तिरंगी लढत; महायुतीकडून मीनल साठे यांना उमेदवारी

पंढरपूर : विधानसभा निवडणुकीसाठी अजूनही काही मतदारसंघात उमेदवाराचा शोध सुरु आहे. यात माढा मतदारसंघात उमेदवार शोधानंतर महायुतीला अखेर उमेदवार मिळाला आहे. राष्ट्रवादी अजित पवार गटाच्या उमेदवार म्हणून माढ्याच्या नगराध्यक्ष मीनल साठे यांना उमेदवारी मिळाली आहे. बबन शिंदे यांचा मुलगा अपक्ष मैदानात उतरणार आहे. तर शरद पवार यांनी अभिजित पाटील यांन उमेदवारी दिली आहे.

विधानसभा निवडणुकीची (Vidhan Sabha Election) रणधुमाळी आता जोर धरू लागली आहे. उमेदवारी अर्ज दाखल करण्यासाठी शेवटचा टप्पा येऊन ठेपला आहे. मात्र अनेक ठिकाणी उमेदवार निवडीचा पेच असल्याने शोध सुरूच आहेत. यातीलच माढा या मतदारसंघात महायुतीकडून (Mahayuti) उमेदवार शोध सुरु होता. यानंतर अखेर उमेदवाराचा शोध पूर्ण झाला असून मीनल साठे यांना उमेदवारी देण्यात आली आहे. 

माढा मतदारसंघात अजित पवार यांना उमेदवार मिळत नव्हता अशी चर्चा होती. मात्र सरते शेवटी अजित पवार यांनी माढा तालुक्यातील जुना मातब्बर गट असणाऱ्या माजी आमदार धनाजी साठे यांच्या स्नुषा मिनल साठे यांना उमेदवारी देऊ केली आहे. आमदार यशवंत माने यांनी राष्ट्रवादी अजित पवार गटाचा ए बी फॉर्म मीनल साठे यांना दिला. यानंतर आज साठे आपला उमेदवारी अर्ज दाखल करणार आहेत. यानंतर माढा मतदारसंघात आता राष्ट्रवादी शरद पवार गटाचे उमेदवार अभिजीत पाटील व राष्ट्रवादी अजित पवार गटाचे उमेदवार मीनल साठे आणि अपक्ष उमेदवार रणजीत शिंदे यांच्यात लढत होणार आहे.