Nagpur Politics: फडणवीसांच्या नागपुरात राष्ट्रवादीचा नवा प्लान; शरद पवारांच्या सूचनेनंतर पक्षातील नेते सक्रिय

Nagpur News: आगामी निवडणुकीच्या पार्श्वभूमीवर सर्वच राजकीय पक्षांनी रणनीती आखायला सुरुवात केली आहे. राष्ट्रवादीने देखील आगामी निवडणुकींच्या पार्श्वभूमीवर बैठकांचा सपाटा सुरू केला आहे. काही दिवसांपूर्वीच राष्ट्रवादीने राष्ट्रीय कार्यध्यक्षांची निवड केली. त्यानंतर आता राष्ट्रवादीने शरद पवारांच्या सूचनेनंतर आता देवेंद्र फडणवीसांच्या नागपुरातही लक्ष द्यायला सुरुवात केली आहे. (Latest Marathi News)

एकीकडे राष्ट्रवादीचे सर्वेसर्वा शरद पवार आणि भाजप नेत्यांमध्ये आरोप प्रत्यारोपाचा सामना सुरु आहे. तर दुसरीकडे शरद पवारांच्या आदेशानं फडणवीसांच्या नागपुरात राष्ट्रवादीने प्लान तयार केला आहे.

'वन बुथ टेन युथ'च्या फॅार्म्युल्यानुसार नागपुरात राष्ट्रवादीने बूथ बांधणी सुरु केली आहे. एका बुथवर १० तरुणांची फळी तयार करायची असं नियोजन राष्ट्रवादीनं केलं आहे . आगामी महानगरपालिका, लोकसभा आणि विधानसभा निवडणूकीसाठी राष्ट्रवादीचं 'वन बुथ टेन युथ'च्या फॅार्म्युल्यानुसार पक्षबांधणी सुरु केली आहे.

आतापर्यंत नागपूरातील २५० बुथवर बांधणी केली असून आगामी महानगरपालिका, लोकसभा आणि विधानसभा निवडणूकीसाठी राष्ट्रवादी तयारी करत आहे. सर्वात महत्त्वाचं म्हणजे आघाडीत काँग्रेसकडे असलेल्या जागांवरंही राष्ट्रवादी निवडणूक तयारी करत आहे. यासंदर्भात राष्ट्रवादीचे शहराध्यक्ष दुनेश्वर पेठे यांनी ही माहिती दिली आहे. (Nagpur Political News)

शरद पवारांची देवेंद्र फडणवीसांना गुगली

शरद पवारांनी कालच्या पत्रकार परिषदेत देवेंद्र फडणवीसांच्या आरोपांना प्रत्युत्तर दिलं. शरद पवार म्हणाले की, २०१४ सालची निवडणूक झाल्यानंतर भाजपला बाहेरून पाठिंबा देण्याची भूमिका मी घेतली होती. नंतर द्यायची वेळ आली नाही. मात्र ते देण्या मागं आमचं काही करणं होतं.'

'यानंतरच्या काळामध्ये त्यांनी जे सांगितलं आहे, आमच्यात अनेक गोष्टींची चर्चा झाली. ही गोष्ट खरी आहे. पण काल त्यांनी स्वतःच सांगितलं आहे, याबाबत मी दोन दिवसांनी धोरण बदललं. मग शपथ घायचं दोन दिवसांनी काय कारण होतं आणि ती चोरून पहाटे घेण्याचं काय कारण? असा सवाल करत शरद पवारांनी देवेंद्र फडणवीस यांना गुगली टाकली.