CM Eknath Shinde : सर सलामत तो...; हेलिकॉप्टर इमर्जन्सी लँडिंगच्या घटनेवर जितेंद्र आव्हाडांचा CM शिंदेंना सल्ला

Jitendra Awhad - Eknath Shinde : मुख्यमंत्री एकनाथ शिंदे काल, गुरुवारी सातारा येथे जात असताना खराब हवामानामुळं हेलिकॉप्टरचं इमर्जन्सी लँडिंग करावं लागलं होतं. या घटनेवरून माजी मंत्री आणि राष्ट्रवादी काँग्रेसचे नेते जितेंद्र आव्हाड यांनी मुख्यमंत्री एकनाथ शिंदे यांना सल्ला दिला आहे. मुख्यमंत्री साहेब आपल्यात राजकीय मतभेद जरूर आहेत. मी हे विसरू शकत नाही की आपण मुख्यमंत्री होण्यापूर्वी आपले अतिशय जवळचे स्नेहाचे संबंध होते, असं आव्हाड यांनी ट्विटमध्ये म्हटलं आहे.

मुख्यमंत्री एकनाथ शिंदे (Eknath Shinde) काल गुरुवारी सातारा येथे जात होते. मात्र, खराब हवामानामुळं त्यांच्या हेलिकॉप्टरचे इमर्जन्सी लँडिंग करावे लागले होते. या घटनेवरून जितेंद्र आव्हाड यांनी त्यांना सल्ला दिला आहे. यासंबंधी त्यांनी ट्विटरवर पोस्ट केली आहे. (Latest Marathi News)

मुख्यमंत्री साहेब, आपल्यामध्ये राजकीय मतभेद जरूर आहेत. मी हे विसरू शकत नाही की, आपण मुख्यमंत्री (Chief Minister) होण्यापूर्वी आपले अतिशय जवळचे स्नेहाचे संबंध होते. काल आपण हट्टाने हेलिकॉप्टरचा पायलट नाही म्हणत असताना, त्याला हवामान खराब असल्याचे सांगितले जात असताना देखील त्याला हेलिकॉप्टरने गावी जाण्यासाठी उड्डाण घेण्यास सांगितले. आपण हेलिकॉप्टर साताऱ्याला उतरवलत, नंतर आपण कुठे गेलात हे मला माहीत नाही, असे आव्हाड यांनी ट्विटमध्ये म्हटलं.

हवामान खराब असताना कधीही हेलिकॉप्टर उडवू नये हे जागतिक अलिखित संकेत आहेत. आपण हे का केलेत ते मला माहीत नाही. पण, हे असं करणं महाराष्ट्राच्या दृष्टीने आणि आपल्या वैयक्तिक दृष्टीने चुकीचे आहे. 'सर सलामत तो पगडी पचास' अशी एक म्हण प्रचलित आहे, असा अप्रत्यक्ष सल्लाही आव्हाड यांनी मुख्यमंत्री शिंदेंना दिला.

आपण अशी भूमिका घेणे किंवा असा हट्ट धरणे हे मला वैयक्तिकरित्या पटलेले नाही. कारण कोणी काहीही म्हणो आपण एकेकाळचे चांगले मित्र होतो. ह्या नात्यानेच मी हे लिहीत आहे. असे पुन्हा कधीही करू नका, असेही आव्हाडांनी ट्विटमध्ये म्हटलं आहे.