महापालिका निवडणुकांसाठी राष्ट्रवादीचा मास्टर प्लान, शरद पवारांनी दिल्या 'या' सूचना

रश्मी पुराणीक

मुंबई : आगामी होणाऱ्या १४ महापालिका निवडणुकांच्या पार्श्वभूमीवर सर्वच पक्षांनी रणशिंग फुंकलं आहे. महापालिकांवर सत्ता (Municipal corporation election) स्थापन करण्यासाठी राष्ट्रवादी कॉंग्रेस पक्षाने मास्टर प्लान केला आहे. आगामी स्थानिक स्वराज्य संस्थांच्या निवडणुकांबाबत राष्ट्रवादीचे अध्यक्ष शरद पवार (Sharad Pawar) यांनी कार्यकर्त्यांसह मंत्र्यांनाही कानमंत्र दिला आहे.

चौदा महापालिकांमध्ये जिथे निवडणुका होणार आहेत, तिथे आघाडी करण्याबाबत चर्चा सुरु करा. शिवसेना (Shivsena) आणि कॉंगेस (congress) नेत्यांबरोबर चर्चा करा. आघाडी करण्यात नेमकी काय समस्या आहे, ते समजून घ्या, अशा सूचना शरद पवार (Sharad Pawar) यांनी राष्ट्रवादी कॉंग्रेसच्या बैठकीत कार्यकर्त्यांना आणि मंत्र्यांना दिल्या आहेत.

दरम्यान, आगामी होणाऱ्या महापालिका निवडुकांच्या पार्श्वभूमीवर शरद पवार यांनी मंत्र्यांनाही जबाबदारी दिली आहे. राज्याचे मुख्यमंत्री अजित पवार यांना पुणे आणि पिंपरी चिंचवड विभागाची जबाबदारी देण्यात आलीय. राज्याचे गृहनिर्माण मंत्री जितेंद्र आव्हाड यांना ठाणे, नवी मुंबई, कल्याण- डोंबिवली, वसई-विरार, उल्हासनगरची जबाबदारी दिलीय.

प्रफुल्ल पटेल आणि दिलीप वळसे पाटील यांना नागपूर व अमरावती, कोल्हापूरची जबाबदारी हसन मुश्रीफ तर नाशिकसाठी छगन भुजबळ तर दत्ता भरणे यांना सोलापूरची जबाबदारी सोपवण्यात आली आहे. त्यामुळे आगामी होणाऱ्या महापालिका निवडणुकांमध्ये महाविकास आघाडी आणि विरोधी पक्षांमध्ये होणारी रणधुमाळी पाहणे औत्सुक्याचे ठरणार आहे.

Edited By - Naresh Shende