Navi Mumbai : घरात घुसून तरुणीला बेदम मारहाण; कुत्रा घाण करत असल्याच्या कारणातून शेजाऱ्यांकडून भयानक कृत्य

विकास मिरगणे 
नवी मुंबई : शेजारी राहणाऱ्यांनी कुत्रा पाळलेला असून हा कुत्रा घराच्या अंगणात घाण करतो; या कारणातून शेजारी राहणाऱ्या इसमाने घरात घुसून तरुणीला डोक्यात दगड घालत बेदम मारहाण केली. सदरची धक्कादायक घटना ऐरोली जुना चिंचपाडा परिसरात घडली आहे. याबाबत रबाळे एमआयडीसी पोलीस स्टेशनमध्ये गुन्हा दाखल करण्यात आला असून अधिक चौकशी सुरु आहे. 

नवी मुंबईच्या आदिवासी पाडा, जुना चिंचपाडा ऐरोली येथे वास्तव्यास असलेल्या निशा वाघेला (वय २५) या तरुणीला मारहाण करण्यात आली आहे. निशा हि मोठी बहीण अंजु व तिच्या मुलीसोबत वास्तव्यास आहे. दरम्यान शुक्रवारी (२० जुन) पहाटे निशा वाघेला घरात लादी पुसत होती. यावेळी शेजारील मनोज नामक इसम घरासमोर आला व “तुम्हारा कुत्ता मेरे घर के सामने गंदगी करता है, उसको संभालो नही तो तुमको मैं मार डालूंगा" असे बोलू लागला. त्यावेळी निशा यांनी तु असे का बोलत आहे, हवे तर मी घाण साफ करते; असे बोलत घरात जाऊ लागली.  

दगडाने मारहाण करत उचलून घराबाहेर फेकले 

याच वेळी काहीही न बोलता मनोजने पाठीमागुन येत दगडाने निशाच्या डोक्यावर व चेहऱ्यावर मारहाण केली. तसेच तिला लाथाबुक्क्याने बेदम मारहाण केली. यावेळी निशाने आरडाओरडा केली असता मनोजने तिला उचलुन घराबाहेर फेकून दिले. निशाचा आरडाओरडा बघता शेजारील लोक जमा झाले असता घाबरुन मनोजने तेथून पळ काढला. तर औषध आणायला गेलेल्या निशाच्या बहिणीला घडलेला प्रकार समजताच तिने घराकडे धाव घेतली. 

पोलिसात गुन्हा दाखल 

निशा जमिनीवर पडलेली होती. तिच्या डोक्यातून व डोळ्याजवळून रक्त येत होते. यानंतर तिला रुग्णालयात दाखल करण्यात आले असून तिच्यावर वाशी येथील पालिका रुग्णालयात दाखल करून प्राथमिक दवा उपचार करण्यात आले. तर अंजु व निशा वाघेला यांनी तात्काळ पोलीस स्टेशन गाठून मनोज यांच्यावर रबाळे एमआयडीसी पोलीस स्टेशनमध्ये तक्रार देत गुन्हा नोंद केला. या प्रकरणी पोलीसांकडून अधिक चौकशी सुरु आहे.