Nashik : भाजप नेत्याच्या पुतण्यावर गुन्हा दाखल, आरपीआय नेत्याला अटक; नाशिकमध्ये पोलीस ॲक्शन मोडवर

अभिजीत सोनावणे, साम टीव्ही, प्रतिनिधी

Nashik Police : नाशिक शहरामध्ये वाढत्या गुन्हेगारीचे आता राजकीय कनेक्शन उघड झाले आहे. गुन्हेगारांवर नाशिक पोलिसांनी मोठी कारवाई करायला सुरुवात केली आहे. सातपूर गोळीबार प्रकरणात पोलिसांनी आरपीआयच्या बड्या नेत्याला अटक केली आहे. त्यांनी नेत्याच्या मुलालादेखील ताब्यात घेतले आहे. दुसऱ्या गोळीबार प्रकरणामध्ये भाजप नेत्याच्या पुतण्यावर गुन्हा दाखल करण्यात आला आहे.

मागील काही दिवसांपासून नाशिक शहर आणि आसपासच्या परिसरात गुन्हेगारीचे प्रमाण वाढत आहे. गुन्हेगारी कमी करण्यासाठी नाशिकचे पोलीस आयुक्त संदीप कर्णिक ॲक्शन मोडवर आले आहे. पोलिसांच्या तपासात अनेक धक्कादायक गोष्टी समोर आल्या आहेत. वाढत्या गुन्हेगारीचे थेट कनेक्शन राजकीय नेत्यांशी असल्याची माहिती उघडकीस आली आहे.

सातपूर गोळीबार प्रकरणात रिपब्लिकन पार्टी ऑफ इंडिया या पक्षाचे नेते प्रकाश लोंढे यांना अटक करण्यात आली आहे. गोळीबार प्रकरणात भीतीचे वातावरण निर्माण करुन बार मालकाकडून पैसे उकळण्याचा लोंढे यांनी कट आखला होता. या गोळीबारात बारमालकाला गोळी लागली. या प्रकरणी पोलिसांनी माजी नगरसेवक आणि आरपीआय आठवले गटाचे नेते प्रकाश लोंढे आणि त्यांचा पुत्र दीपक लोंढे यांना अटक केली.

दुसऱ्या बाजूला, रामवाडी-गंगापूररोड परिसरात सचिन साळुंखे याच्यावर झालेल्या गोळीबार प्रकरणी भारतीय जनता पक्षाचे नेते सुनील बागुल यांचा पुतण्या अजय बागुलच्या विरोधात गुन्हा दाखल करण्यात आला. अजय बागुलसह इतर तीन ते चार संशयित आरोपी फरार असून पोलीस त्यांचा शोध घेत आहेत. भाजप नेत्याच्या पुतण्या गोळीबारात सहभागी असल्याने गुन्हेगारी विश्व आणि राजकीय विश्व यांचे कनेक्शन स्पष्ट झाले आहे.