Nashik News: लग्नासाठी मुलगी पाहायला गेला, पण परत आलाच नाही; तरुणासोबत काय घडलं?

अजय सोनवणे, नाशिक

लग्नासाठी मुलगी पाहायला गेलेला तरुण पूराच्या पाण्यामध्ये वाहून गेल्याची धक्कादायक घटना समोर आली आहे. नाशिक जिल्ह्यातल्या सुरगाणामध्ये ही घटना घडली. तरुणाचा मृतदेह सापडला असून त्याच्या मृत्यूमुळे कुटुंबियांना मोठा धक्का बसलाय. या घटनेमुळे परिसरात हळहळ व्यक्त केली जात आहे. नाशिक जिल्ह्यामध्ये गेल्या काही दिवसांपासून पडणाऱ्या पावसामुळे नदी-नाल्यांना पूर आला आहे. त्यामुळे काही ठिकाणी अनेक गावांचा देखील संपर्क तुटला आहे.

मिळालेल्या माहितीनुसार, नाशिकच्या सुरगाणा तालुक्यातील खोबळा जिगरमध्ये ही घटना घडली आहे. वसंत सुरेश मासी (२१ वर्षे) असं मृत तरुणाचे नाव आहे. वसंत गुजरात राज्यातील केळधा येथे लग्नासाठी मुलगी पाहण्यासाठी गेला होता. मुलगी पाहायला जात असताना पूराच्या पाण्यामध्ये वाहून गेल्यामुळे त्याचा मृत्यू झाला. चार दिवसांनंतर त्याचा मृतदेह सापडला.

मुसळधार पावसामुळे पार नदीला पूर आलाय. मुलगी पाहायला जात असताना नदीला आलेला पूर पाहून वसंतने आपली दुचाकी नदी काठावर लावून नदी पार करण्याचा प्रयत्न केला. पण पाण्याचा प्रवाह जास्त होता. त्यात वसंतला पाण्याचा अंदाज आला नाही. नदी पार करत असताना पाय घसरून तो खाली पडला आणि पाण्याच्या प्रवाहासोबत तो वाहून गेला.

वसंत तीन ते चार किलोमीटरपर्यंत नदीच्या पाण्यासोबत वाहून गेला. स्थानिक नागरिक त्याच शोध घेत होते. अखेर चार दिवसांनंतर वसंतचा मृतदेह वांगणपाडाजवळील खोडदा डोहाजवळ आढळून आला. स्थानिक नागरिकांनी त्याचा मृतदेह नदीपात्रातून बाहेर काढला आणि त्याच्या कुटुंबीयांच्या ताब्यात दिला. मुलाचा मृत्यू झाल्यामुळे वसंतच्या कुटुंबीयांवर दु:खाचा डोंगर कोसळला आहे.