धक्कादायक! नासर्डी नदीत मित्रांसह पोहण्यासाठी गेलेल्या शाळकरी मुलाचा मृत्यू

तबरेज  शेख

नाशिक - तिडके काॅलनीलगतच्या मिलिंदनगर येथील नासर्डी नदीत मित्रांसह पाेहण्यास गेलेल्या 12 वर्षीय शाळकरी मुलाचा पाण्याच्या भाेवऱ्यात सापडून मृत्यू झाल्याची दुर्दैवी घटना रविवारी घडली. सागर चाैधरी असे मृत मुलाचे नाव असून ताे इयत्ता सातवीत शिक्षण घेत हाेता. रविवार हा सुटीचा दिवस असल्याने मिलिंद नगर येथील सात ते आठ मुले व सागर हे येथील मित्तल टाॅवर जवळील नासर्डी नदी (Nasardi River) परिसरात खेळायला गेले.

हे देखील पाहा -

दरम्यान, नदीतील पाण्याची पातळी कमी झाल्याने काही मुले पाण्यात पाेहण्यास उतरली. तेव्हा सागरही पाण्यात उतरला. त्याचवेळी ताे नदी पात्रातील खाेल पाण्यात बुडून वाहत वाहत मिलिंद नगरजवळील भवऱ्यात सापडला.

याचवेळी बाकीच्या मुलांनी आरडाओरडा करुन घडलेल्या घटनेची माहिती नागरिक व अग्निशमन दलाला दिली. त्यानंतर अग्निशमन दलाचे रेस्क्यू पथक व मुंबई नाका पोलीस घटनास्थळी दाखल झाले. त्यांनी मिलिंदनगरजवळील नदीपात्रातून सागरला बाहेर काढून रुग्णालयात दाखल केले. मात्र, त्याला डाॅ. पाटील यांनी मृत घाेषित केले. या घटनेने मिलिंदनगर परिसरात शाेककळा पसरली असून मुंबई नाका पाेलिस ठाण्यात आकस्मिक मृत्यूची नाेंद करण्यात आली आहे.