Nashik Water Shortage : नाशिकवर ऐन पावसाळ्यात पाणीसंकट; अनिश्चित काळासाठी पाणीपुरवठा राहणार बंद

तबरेज शेख 

नाशिक : नाशिक शहरामधून मोठी बातमी समोर येत असून शहरातील पाणी पुरवठा पुढील काही दिवस बंद राहणार आहे. नाशिक शहरातील पाणी पुरवठा पुढील दिवसात अनिश्चित काळासाठी बंद ठेवण्यात येणार असल्याची माहिती महापालिकेतील पाणी पुरवठा विभागातील अधिकाऱ्यांनी दिली आहे. यामुळे नाशिकरांवर आता पाण्याचे संकट उभे राहिले आहे.

नाशिक (Nashik) महानगरपालिकेची गंगापूर धरण थेट पाणी पुरवठा योजनेतील रॅा वॅाटर रायझींग मेन ही पाईपलाईन सातपूर येथे लिकेज झाली आहे. नाशिक महानगरपालिकेने तातडीने पंपिंग बंद करून लिकेज दुरुस्तीचे काम हाती घेण्यात आले आहे. यामुळे पाणी पुरवठा (Water Supply) विस्कळीत होणार आहे. हा लिकेज काढण्याचे काम किती दिवस चालेल याबाबत अनिश्चितता आहे. परिणामी नाशिक शहरातील पाणी पुरवठा अनिश्चित काळासाठी बंद राहणार आहे. 

पावसाळ्यात पाणी संकट 

पाईप लाईन लिकेज काढण्याचे काम हाती घेण्यात आल्याने या काळात नागरिकांनी पाण्याचा जपून वापर करावा, असे अवाहन नाशिक महानगरपालिका पाणी पुरवठा विभागाकडून करण्यात येत आहे. मात्र नाशिकरांना पाण्यासाठी भटकंती करावी लागणार आहे. टँकर किंवा विकतचे पाणी घ्यावे लागणार आहे.