Nashik Politics: नाशिकमध्ये शिंदेंनी डाव टाकला, बड्या नेत्याचा शिवसेनेत प्रवेश; शरद पवारांना मोठा धक्का

राज्यातील २९ महानगर पालिका निवडणूक प्रचारांचा धुरळा उडालाय. पक्षांच्या प्रचार आणि रॅलीमुळे राजकीय वातावरण ढवळून निघाले आहे. नगरपालिका आणि नगर पंचायतीच्या निवडणुकांदरम्यान मोठ्या प्रमाणात पक्षांतर झाले होते. तोच फंडा आता महानगरपालिकेच्या दरम्यान पाहायला मिळतोय. अनेक पक्षांमध्ये इनकमिंगही पहायला मिळत आहे. अशातच आता नाशिकमध्ये शरद पवारांना मोठा धक्का बसला आहे.

एका बड्या नेत्याने शिवसेनेत प्रवेश केल्यानं ऐन निवडणुकीत शिवसेनेची ताकद वाढली आहे. नाशिक जिल्ह्यातील महाराष्ट्र नवनिर्माण सेनेचे माजी आमदार आणि राष्ट्रवादी काँग्रेस शरद पवार गटाचे प्रदेश उपाध्यक्ष नितीन भोसले यांनी आपल्या असंख्य कार्यकर्त्यांसह शिवसेनेत प्रवेश केला. नाशिकचे राजकारण ढवळून निघाले.

या पक्षप्रवेशाचा परिणान आगामी महापालिकेच्या निवडणुकीवर होण्याची शक्यता आहे. शरद पवार गटाचे प्रदेश उपाध्यक्ष नितीन भोसले यांच्यासह त्यांच्या अनेक कार्यकर्त्यांनीही शिवसेनेत प्रवेश केला. भाजपमध्ये प्रवेश करणाऱ्यांमध्ये महाराष्ट्र ट्रायथलॉन असोसिएशनचे सचिव राजेंद्र लिंबाळते, नाशिक ॲडव्हर्टायझिंग असोसिएशनचे प्रशांत ठाकरे, युवराज भोसले, सचिन सोनवणे, प्रसाद आंबेकर, अनुप भोसले, पृथ्वीश भोसले यांचा समावेश आहे.

दरम्यान नितीन भोसले यांच्यासह माजी महापौर अशोक मुर्तडक व माजी महापौर दशरथ पाटील आज शिवसेनेत प्रवेश केला. उपमुख्यमंत्री एकनाथ शिंदे यांच्या ठाण्यातील शुभ दीप निवासस्थानी हा पक्षप्रवेश पार पडला.