Shahada Police : दादागिरी करत महिलाची काढली छेड; ताब्यात घेत तरुणाची काढली गावभर धिंड

सागर निकवाडे 

नंदुरबार : महिला व मुलींची छेड काढण्याचे प्रमाण दिवसागणिक वाढले आहे. पोलीस प्रशासनाकडून या विरोधात पावले उचलली जात आहेत. तरी देखील दादागिरी करत छेड काढली जात आहे. अशाच प्रकारे एका तरुणाने महिलांची छेड काढणाऱ्या तरुणाला पोलिसांनी ताब्यात घेत त्याला चांगलीच अद्दल घडविली आहे. पोलिसांनी या तरुणाची गावभर धिंड काढत ग्रामस्थांची माफी मागायला लावली आहे. 

नंदुरबार जिल्ह्यातील शहादा शहरात हा प्रकार घडला होता. यात शहरातील मेन रस्त्यावर तरुणांकडून दादागिरी करत नागरिकांना त्रास देणे, धमकावणे आणि महिलांशी गैरवर्तन करत होता. याबाबतच्या तक्रारी पोलिसात आलेल्या होत्या. या वरून पोलिसांनी सदर युवकाला ताब्यात घेतले. यानंतर त्याला चांगलीच अद्दल घडविली आहे. पोलिसांनी केलेल्या हा कारवाईमुळे या तरुणाची पुढे जाऊन असा प्रकार करण्याची हिम्मत होणार नाही. 

कान पकडायला लावत फिरविले गावभर 

शहादा शहरात दादागिरी करणारा व महिलांना छेडछाड करणाऱ्या या युवकाला चांगलेच महाग पडले आहे. पोलिसांच्या कडक कारवाईच्या विळख्यात सापडला असून शिस्त लावण्यासाठी पोलिसांनी त्याला कान धरून, हात जोडून शहरातील मुख्य रस्त्यावर लोकांसमोर फिरवले. या प्रकारामुळे त्या युवकाची मस्ती पूर्णपणे जिरली.

पोलिसांच्या भूमिकेचे स्वागत 

दरम्यान मागील काही दिवसांपासून हा त्रास वाढलेला होता. परंतु पोलिसांच्या धडाकेबाज कारवाईचे शहरभर कौतुक होत असून अशा कृत्यांना आळा बसण्यासाठी ही घटना धडा ठरेल; अशी भावना नागरिकांनी व्यक्त केली. कायदा व सुव्यवस्था राखण्यासाठी पोलिसांनी घेतलेली ही ठाम भूमिका आदर्श असल्याचे मत अनेकांनी मांडले.