शिवसेना शिंदेसेनेला भाजपकडून जोरदार झटका; दोन बड्या नेत्यांची कमळाला साथ, काँग्रेसलाही खिंडार

बहुप्रतिक्षित स्थानिक स्वराज्य संस्थांच्या निवडणुकांचं बिगुल वाजलं. नगरपरिषद आणि नगरपंचायत निवडणुकांची घोषणा करण्यात आली. त्यानुसार, २ डिसेंबर २०२५ रोजी मतदान पार पडेल. तर, ३ डिसेंबर २०२५ रोजी मतमोजणी पार पडणार आहे. २४६ नगरपरिषदा आणि ४२ नगरपालिकांसाठी ही निवडणूक होणार आहे.

दरम्यान, याच पार्श्वभूमीवर नंदुरबारमध्ये मोठी राजकीय उलथापालथ झाली आहे. शिवसेना शिंदे गटातील सरपंच, उपसरपंच यांनी पक्षाला सोडचिठ्ठी दिली आहे. त्यांनी भाजप पक्षात प्रवेश केला आहे.

स्थानिक स्वराज्य संस्थांच्या निवडणुकीच्या पार्श्वभूमीवर नंदुरबारच्या अक्कलकुवा तालुक्यात राजकीय वारे वेगाने वाहू लागले आहेत. शिवसेना शिंदे गटाला धक्का बसला आहे. अक्कलकुवा तालुक्यातील २ सरपंच यांनी शिवसेना शिंदे गटाला राम राम करण्याचा निर्णय घेतला आहे.

शिवसेना शिंदे गटाचे अक्कलकुवा विधानसभेचे आमदार आमश्या पाडवी यांचे खंदे समर्थक, काकडखुंटचे माजी सरपंच विनोद वडवी आणि सोनपाटीचे माजी सरपंच कुवरसिंग पाडवी यांनी शिवसेना शिंदे गटाला जय महाराष्ट्र केलं आहे. त्यांनी भाजपचं कमळ हाती घेतलं आहे.

मिळालेल्या माहितीनुसार, या पक्षप्रवेश सोहळ्यात शिवसेना आणि काँग्रेसच्या उपसरपंच आणि ग्रामपंचायत सदस्यांसह पदाधिकाऱ्यांनी भाजपची साथ दिली. भाजप नेत्या हिना गावित यांच्या उपस्थितीत शेकडो पदाधिकाऱ्यांनी भाजप पक्षात प्रवेश केला. या पक्षप्रवेश सोहळ्यानंतर नंदुरबारमध्ये शिवसेना शिंदे गटाला खिंडार पडलं असल्याचं बोललं जात आहे.