Bribe Trap : सफाई कामगार,चालकाने घेतली १० हजाराची लाच; फिटनेस प्रमाणपत्र मिळवून देण्यासाठी मोबदला

नंदुरबार : जिल्हा रुग्णालयातून फिटनेस प्रमाणपत्र मिळवून देण्याच्या मोबदल्यात नंदुरबार (Nandurbar) आगारातील चालकाकडून लाच मागितली. १० हजाराची लाच स्वीकारताना सफाई कामगार व खासगी वाहन चालकाला लाचलुचपत प्रतिबंधक विभागाने (ACB) रंगेहात पकडले.

नंदुरबार जिल्ह्यातील धानोरा ग्रामीण रूग्णालयाचा सफाई कामगार जयेश शंकर तेजी याने लिपिक असल्याचे भासवून एका खासगी वाहन चालक तुकाराम भिला भोई याच्या मदतीने बस आगारातील ५५ वर्षीय व्यक्तीकडून १२ हजाराची लाचेची (Bribe) मागणी केली. रनाळे खुर्द (पो.भादवड ता.नंदुरबार) येथील तक्रारदार हे मे २०२३ पासून प्रकृतीच्या कारणास्तव वैद्यकीय रजेवर होते. त्यांची प्रकृती आता सुधारल्याने त्यांना नोकरीवर हजर व्हायचे होते. यासाठी जिल्हा रूग्णालयातील फिटनेस प्रमाणपत्राची आवश्यकता असल्याने नंदुरबार जिल्हा रूग्णालयात (Hospital) कार्यपद्धती जाणून घेण्यासाठी गेले होते.  

या दरम्यान जयेश शंकर तेजी याने त्यांच्याशी संपर्क साधला असता मी जिल्हा रूग्णालयात लिपिक असल्याचे सांगितले. तसेच त्याचा साथीदार तुकाराम भोई हा डॉक्टर असल्याचे सांगत जिल्हा रुग्णालयातून फिटनेस प्रमाणपत्र मिळवून देतो, त्या बदल्यात १२ हजार रुपयांची मागणी केली. तडजोडीअंती १० हजारांत ठरले. ही रक्कम पंचांसमक्ष स्वीकारताना लाचलुचपत प्रतिबंधक विभागाने सापळा रचून सफाई कामगार जयेश तेजी व खासगी वाहनचालक तुकाराम भोई या दोघांना ताब्यात घेतले.