Nandurbar Land collapsed: मोठी दुर्घटना टळली! चांदसैली घाटात दरड कोसळली; २ तासांपासून वाहतूक ठप्प

सागर निकवाडे, नंदुरबार|ता. ८ जून २०२४

नंदुरूबार जिल्ह्यात दरड कोसळल्याची मोठी दुर्घटना घडली आहे. नंदुरबार जिल्ह्यातील चांदसैली घाटात दरड कोसळली. वाहतुक सुरू असतानाच ही दरड कोसळल्याची घटना घडली. सुदैवाने यामध्ये कोणतीही जिवितहानी झाली नसून मोठी घटना टळली आहे.

याबाबत समोर आलेल्या माहितीनुसार, नंदुरबार जिल्ह्यातील चांदसैली घाटात दरड कोसळल्याची घटना घडली. वाहतूक सुरू असतानाच ही दरड कोसळली मात्र सुदैवाने कोणतीही मोठी दुर्घटना घडलेली नाही. या दुर्घटनेनंतर दोन तासांपासून घाटातील वाहतूक ठप्प झाली असून ही दरड आता कधी बाजूला होणार? आणि रस्ता कधी सुरू होणार? याबाबत कोणतीच माहिती देण्यात आली नाही.

या घाटात नेहमी दरड कोसळत असतात. परंतु स्थानिक आमदार आणि बांधकाम विभाग नेहमी दुर्लक्ष करत असतात. घाटातील रस्ता तळोदा आणि धडगाव तालुक्याला जोडणारा मुख्य रस्ता आहे. परंतु आमदार के.सी. पाडवी आणि आमदार राजेश पाडवी यांनी दरड कोसळण्याच्या बाबतीत कधीही ठोस भूमिका घेतली नसल्याने नाराजी व्यक्त केली जात आहे.

तसेच हा भाग दरड प्रवण भाग असून बांधकाम विभागाकडून याकडे दरवर्षी दुर्लक्ष केले जाते. यावर्षीही या भागात पहिल्याच पावसात दरडी कोसळल्याच्या घटना घडल्याने बांधकाम विभागाच्या उपाययोजनांवर प्रश्नचिन्ह निर्माण झाले आहे. दरम्यान, घाटातील वाहतुक ठप्प झाल्याने प्रवाशांना नाहक त्रास सहन करावा लागत आहे.